Маңғыстау облысындағы Кендірлі ауылында алғаш рет Президент сайлауы өтіп жатыр

Жаңаөзен қаласына қарасты Кендірлі ауылында алғаш рет Президент сайлауы өтіп жатыр. Ел тарихындағы маңызды күні ауыл халқы сайлау учаскелеріне келіп, өз таңдауын жасауда. Дауыс берушілердің арасында жас жұбайларда бар, деп хабарлайды Қоғамдық коммуникация орталығы қала әкімдігінің баспасөз қызметіне сілтеме жасап.

Кендірлі - Жаңаөзен қаласына қарасты елдімекендердің бірі. Ауыл 2020 жылдың соңында құрылған.

Жаңадан құрылған ауыл күн санап өсіп келеді. Мұнда 12 613 адам тұрады. Оның 6498 сайлаушы. Қазір олардың 3 441-і өз дауысын берді.

Ауылдың мәдениет үйінде орналасқан  №109 сайлау учаскесінде таңертеннен бері дауыс беруге келген ауыл тұрғындары көп. Саяси науқаннан қалыс қалмай, таңдауын жасауға келгендердің қатарында жаңа отасқан жас жұбайлар Қаршыға Байтөреев пен Күміс Шалқаровада бар. Қаршыға жеке кәсіппен айналысады. Ал келіншегі Күміс - тігінші.  

-Егеменді еліміздің баянды болашағы үшін маңызы зор саяси шараға бір кісідей атсалыстық. Отбасымызда ата-анам, інім мен және келіншегім болып сайлауға келдік. Өз таңдауымызды жасадық. Бұл науқанға ең алдымен еліміздің тұрақтылығы нығая түсуі үшін қатысып отырмыз, -дейді Қаршыға Байтөреев.

• 20.11.2022
• 250