Ералы Тоғжанов дзюдодан ҚР Чемпионатында жеңіске жеткен Ақтөбе құрамасын құттықтады

Бүгін облыс әкімі Ералы Тоғжанов дзюдодан Ақтөбе облысы құрамасының жаттығу залына барып, Қазақстан Республикасының чемпионатында топ жарып, өңір үшін тарихи жетістік көрсеткен спортшыларды жеңістерімен құттықтады.

Атырауда өткен ел біріншілігінде 19 аймақтан 500-ге жуық татами шебері қатысқан. Байрақты бәсекеде облыс құрамасы 3 алтын, 1 қола медаль жеңіп, тамаша нәтиже көрсетті.

«Қай лауазымда болсаңыз да, біздің талантты балалар, жастарымызға өздерінің қабілеттерін және лайықты нәтижелерін көрсетуге мүмкіндік бере отырып, спорт саласын барынша қолдайсыз. Чемпионаттағы лайықты жеңісіміз — бұл сіздің жетістігіңіз», — деді өңір басшысына алғысын жеткізген жаттықтырушы Есенжол Мисин.

«Біздің команда 1999 жылдан бері алғаш рет Ақтөбе спортының тарихында үздік нәтиже көрсетті. Бұл — үздіксіз еңбектеріңіздің арқасы және барша ақтөбеліктердің жеңісі. Әрқайсыларыңыз алдарыңызға үлкен міндеттер қойып, сенімді түрде соған қарай қадам басып келесіздер. Мұндай жетістікке тек рухы мықтылар ғана қол жеткізе алады», — деп атап өтті облыс әкімі.

Чемпиондарға Ералы Тоғжанов Алғыс хаттар мен ақшалай сертификаттар табыс етті. Олардың қатарында құрама қоржынына үш алтын медаль салған команда капитаны Есет Қуанов пен команда мүшелері Аруна Жангелдина, Бақыт Қосақбаева бар. Сондай-ақ, Бакуде мүмкіндігі шектеулі шектеулі жандар арасында өткен чемпионатта қола медаль жеңіп алған парадзюдошы Дулат Бөкенбаевқа да Алғыс хат пен сертификат табыс етілді.

Айта кетейік, Есет Қуанов пен Аруна Жангелдина Қазақстан намысын Токиода өтетін Grand Slam рейтингтік турнирінде қорғайды.

• 21.11.2022
• 227