Асан Дарбаев Будапештте жылу энергетикасы мәселелері бойынша баяндамамен сөз сөйледі

Будапештте (Венгрия) Венгрияның Энергетика және коммуналдық кәсіпорындарды реттеу агенттігінің (MEKH) көмегімен USAID/НАРУК «Орталық Азия елдеріндегі энергетиканы реттеу саласындағы серіктестік» жобасы аясында орталықтандырылған жылумен жабдықтау мәселелері бойынша кеңес өтуде.

Бұл жоба Қазақстанда, Қырғыз Республикасында, Тәжікстанда және Өзбекстанда нормативтік-құқықтық базаны нығайтуға және реттеу саласындағы әріптестердің әлеуетін арттыруға мүмкіндік беретін пәрменді іс-шараларды айқындау арқылы энергетика секторының нақты мәселелерін шешуге бағытталған.

Қазақстаннан таныстыру сапарында жылу энергетикасы саласындағы тарифтік реттеуші ретінде ҚР ҰЭМ Табиғи монополияларды реттеу комитеті, сондай-ақ ҚР Энергетика министрлігі болды.

USAID/НАРУК жобасы энергетика секторын қадағалайтын реттеуші органдардың әлеуетін нығайтуы керек, бұл өз кезегінде қазіргі заманғы, үйлесімді, еркін аймақтық нарыққа және таза энергетикалық инвестициялардың өсуіне ықпал етеді.

Орталық Азиядан келген серіктестер алдында әріптестерінің алдында тұрған проблемаларды шешуде үлкен тәжірибесі бар еуропа елдеріндегі реттеушілерінің өкілдері сөз сөйледі, олар өз елдерінде орталықтандырылған жылумен жабдықтауды реттеу бойынша практикалық тематикалық зерттеулер мен мысалдар келтірді.

Еуропалық әріптестерінен басқа, Қырғыз Республикасының, Тәжікстан және Өзбекстан Республикаларының өкілдері де өз баяндамаларымен сөз сөйлеп, жылу энергиясы саласын реттеу тәжірибесімен бөлісті.

ҚР ҰЭМ ТМРК атынан Қазақстандағы жылу энергетикасы саласындағы реттеу туралы баяндамамен оның басшысы Асан Дарбаев сөз сөйледі.

Асан Дарбаев жылу энергетикасы саласын егжей-тегжейлі сипаттап, осы нарықта тарифтік реттеу қалай жүзеге асырылатынын, сондай-ақ ашық тариф қалыптастыру үшін қандай шаралар қабылданатынын айтып берді.

Аталған іс-шара барысында қатысушыларда Будапешттегі «Фётав Зрт» орталықтандырылған жылумен жабдықтау объектісіне баруға мүмкіндік болды, онда қаладағы барлық орталықтандырылған жылумен жабдықтау желісіне үздіксіз қадағалау мен техникалық қызмет көрсетудің қалай жүзеге асырылатынын өз көздерімен көрді.

Бұл кездесу ашық тарифтерге қол жеткізуде және нормативтік-құқықтық базаны жетілдіруде жақсы тәжірибе алуға мүмкіндік беретіні сөзсіз, және еуропа елдерінде жылу энергетикасын реттеудің қолайлы тәсілдері реттеуге енгізілетін болады.

• 22.11.2022
• 231