Ақтөбеде тоғызқұмалақтан VI Әлем чемпионаты басталды

   «Өнер орталығында» өткен тоғызқұмалақтан VI Әлем  чемпионатының ашылу салтанатына  Ақтөбе облысының әкімі Ералы Тоғжанов, Дүниежүзілік  тоғызқұмалақ федерациясының президенті  Әлихан Байменов, Ұлттық және ат спорты түрлері орталығының директоры Бақдәулет Сәбитов қатысты.

        Әлем чемпионатына 20 елден, оның ішінде АҚШ, Германия, Ауғанстан, Колумбия, Үндістан, Ұлыбритания, Чехия, Бангладеш және т.б. елдерден келген 80 спортшы қатысып жатыр. Ал Қазақстанның намысын 12 спортшы қорғайды.

        Чемпионатқа қатысушы барлық елдің спортшыларына сәттілік тілеген облыс әкімі Ералы Тоғжанов Ақтөбе өңірі үшін әлемдік деңгейдегі жарысты өткізу үлкен мәртебе екендігін атап өтті.

        «Тоғызқұмалақ – 4 мың жылдық тарихы бар, ақыл-ойды дамытатын қазақ халқының ұлттық ойындарының бірі. Бабаларымыз ойлап тапқан зияткерлік спорттың адамзат өркениетінен алар орны ерекше. Қазіргі таңда тоғызқұмалақ ойыны әлемнің түкпір-түкпірінде танымал спорт түріне айналды. 2019 жылы ЮНЕСКО-ның мәдени мұралар тізіміне енді. 2010 жылы тоғызқұмалақтан Астана қаласында бірінші Әлем чемпионаты ұйымдастырылса, VI Әлем чемпионаты киелі мекен Ақтөбеде өткелі отыр. Облыста кәсіби тұрғыда қарқынды дамып келе жатқан спорт түрімен 20 мыңнан аса адам шұғылданады. Соңғы жылдары аймақтық рейтинг қорытындысы бойынша үздік үштікте келеміз. Әрі қарай облысымызда тоғызқұмалақ спортын дамытуға барлық жағдай жасалатындығын жеткізгім келеді», — деп атап өтті спортшыларға әділ ойын, ал жанкүйерлерге жарқын сәттер тілеген Ералы Тоғжанов.

        Әлем чемпионаты Ақтөбеде 21-27 қараша аралығында өтеді. Қатысушылар тоғызқұмалақтың рапид, блиц және классика түрлерінен бақтарын сынайды. Әр топта алғашқы үш орынды иеленген ойыншылар медальдармен марапатталады.

• 28.11.2022
• 261