«Мың бала» республикалық мәдени-ағартушылық жобасының қатысушыларын марапатталды

2022 жылғы 28 қарашада Астана қаласында ҚР Ақпарат және қоғамдық даму министрлігі мен «Қоғамдық келісім» РММ Қазақстан халқы Ассамблеясының «Мың бала» республикалық мәдени-ағартушылық жобасының қатысушыларын марапаттау рәсімін өткізді.

«Мың бала» жобасының мақсаты - мектеп жасына дейінгі балалар мен мектеп оқушыларын, әртүрлі этникалық топтардың жастарын мемлекеттік тілді оқытуда қазақ халқының ұлттық рухани құндылықтарына баулу арқылы қазақстандық бірегейлік пен бірлікті дамытуға үлес қосу болып табылады.

Іс-шараға ҚР Ақпарат және қоғамдық даму министрі Д.Қ. Қыдырәлі, ҚХА төрағасының орынбасары – ҚХА Хатшылығының меңгерушісі М.А. Әзілханов, ҚР Парламенті депутаттары, ҚХА мүшелері, жоба жеңімпаздары, мемлекеттік тілді оқыту бойынша әдіскерлер, жастары ұйымдарының мүшелері  және БАҚ өкілдері қатысты.

Марапаттау рәсімін аша отырып, ҚР Ақпарат және қоғамдық даму министрі Д.Қ. Қыдырәлі қазіргі уақытта қазақ тілі еліміздің барлық азаматтарын біріктіретін негізгі факторға және жалпы азаматтық бірегейлікті дамытудың негізгі күшіне айналғанын, сондай-ақ, мемлекеттік тілдің Қазақстан халқының тұтастығы мен бірегейлігін сақтау мен дамыту маңыздылығы уақыт өте келе арта түсетінін атап өтті.

Министр тілді үйренуге қажетті оқу-әдістемелік және техникалық құралдарды ұлғайту, тілдік ортаны қалыптастыру жасөспірімдердің мемлекеттік тілді үйрену саласында елеулі көрсеткіштерге қол жеткізуіне ықпал ететінін айтты. Мысал ретінде, негізгі міндеті әлеуметтік желі арқылы мемлекеттік тілді үйренудің маңыздылығын қоғамда ілгерілету болып табылатын «Ел бірлігі» Тик-Ток хаус жобасына назар аударды.

Сондай-ақ, Министр Д. Қыдырәлі Мемлекет басшысы Қасым-Жомарт Кемелұлы Тоқаевтың Қазақстан халқына Жолдауында айтқаны – «қазақ тілін дамыту мемлекеттік саясаттың басым бағыттарының бірі болып қала беретінін» атап өтті. «Аталған салада айтарлықтай нәтижелер бар. Қазақ тілі шын мәнінде білім мен ғылым, мәдениет пен іс жүргізу тіліне айналуда», - деді министр.

«Мың бала» республикалық мәдени-ағартушылық жобасы ҚХА бастамасымен 2015 жылдан бастап іске асырылуда.

2015 – 2022 жылдар аралығында жоба шеңберінде барлығы 107 054 іс-шара ұйымдастырылып, 2 577 491 ЭМБ жастар өкілдері қатысты. Ағымдағы жылы осы жобада 9 500 бала бағын сынап, олардың 43-і жеңімпаз атанып, әр түрлі номинациялар бойынша марапатқа ие болды.

 Жоба бағдарламасы халықаралық тәжірибені ескере отырып, барлық қатысушыларға мәдени және тілдік ортаға (шығармашылық жобалар мен конкурстарға қатысу, мемлекеттік тілде фильмдер мен мультфильмдер көру және т.б.) толықтай қосылуға мүмкіндік беретін мәдени-тілдік дағды арқылы жүзеге асырылады.

• 28.11.2022
• 265