Қазақстан Республикасының Үкіметі Франция Республикасының Үкіметімен «Жаһандық жылынуға қарсы күрес саласындағы ынтымақтастықты іске асыру туралы» арнайы келісімге қол қойды

2022 жылғы 30 қарашада Париж қаласында Қазақстан Республикасының Энергетика министрі Болат Ақшолақов Қазақстан Республикасының Үкіметі атынан Франция Республикасының Үкіметімен «Жаһандық жылынуға қарсы күрес саласындағы ынтымақтастықты іске асыру туралы» арнайы келісімге қол қойды (Келісім).

Келісім республикалар арасындағы, атап айтқанда, декарбонизация және жаңартылатын энергия көздері (ЖЭК) саласындағы ұзақ мерзімді екіжақты өзара іс-қимылды нығайтуға бағытталған.

ЖЭК-пен жасыл технологияларды өндіру жөніндегі арнайы Келісімнің мақсаттарына жауап беретін ірі жобаларды дамыта отырып, Қазақстан Республикасы 2030 жылға қарай өндірілетін жаңартылатын энергия үлесін - электр энергиясын өндіруде 15% - ға дейін ұлғайту жөніндегі өз мақсатына қол жеткізуге айтарлықтай жақындап келеді.

2026 жылы іске асыру жоспарланып отырған осындай ірі жобалардың бірі Жамбыл облысында (Мирный кенті) қуаты 1 ГВт, 300МВт-600МВтс энергия жинақтау жүйесі бар жел электр станциясын ұзақ мерзімді электр энергиясын тәуелсіз өндіруші Total Eren және «Самұрық-Қазына» АҚ компаниялар тобымен салу болып табылады.

Жоба шеңберінде көмірқышқыл газы (СО2) шығындыларын жыл сайын кем дегенде 2 миллион тоннаға қысқарту күтілуде, сондай-ақ қазақстандық қамту көзделуде.

Қазақстанда жаңартылатын энергия көздері саласындағы тиісті құзыреттер орталығы құрылады және 2000-нан астам уақытша және тұрақты жұмыс орындары құрылады.

• 30.11.2022
• 298