Маңғыстау облысы ірі көліктік-логистикалық орталыққа айналуда

Биыл 15 қарашада республикалық бюджет комиссиясы "Баутино" жүк айлағы бар Ақтау теңіз сауда портын және «Құрық» портын «Ақтау теңіз порты" арнайы экономикалық аймағы құрамына қосуды мақұлдады.

Бұл қабылданған шара мемлекет басшысы Қасым-Жомарт Тоқаевтың өңірдің көлік-логистикалық әлеуетін одан әрі дамыту, Қазақстанның көліктік-логистикалық хаб ретінде қалыптасуы және өңірде «контейнерлік хаб» құру туралы тапсырмасына сәйкес жүзеге асуда.
Арнайы экономикалық  аумағында аталған порттардың жұмыс істеуі әлемнің озық логистикалық компанияларын тартуға тың серпін әкелмек. Сондай-ақ,  бұл - порт инфрақұрылымын одан әрі дамытуды қамтамасыз етуге, порт қызметтерінің аясын кеңейтуге және сапасын арттыруға, контейнерлік тасымалдар мен жүк айналымын ұлғайтуға, жаңа жұмыс орындарын ашуға мүмкіндік береді.

Бүгінгі таңда Ақтау портын кеңейту және Құрық портында паром кешенін салу бойынша жобалар сәтті іске асырылды. Осының арқасында Каспий маңы елдерінің барлық порттарына және "Солтүстік-Оңтүстік" және Транскаспий халықаралық көлік маршруты бағыттары бойынша жүктерді тасымалдау қамтамасыз етілді.  Ақтау және Құрық порттарының өткізу қабілеті қазір жылына 21 млн тоннадан асады.

Порттарды одан әрі дамыту үшін Министрлік бірқатар инфрақұрылымдық жобаларды іске асыруды жоспарлап отыр. Атап айтқанда, 2025 жылға қарай Ақтау портында контейнерлік хаб құру жоспарлануда.  Жоба «Қуатты өңірлер-ел дамуының драйвері» ұлттық жобасына енгізілген. Шетелдік инвесторлар үшін жобаның тартымдылығын арттыру мақсатында іске асыру БК (біріккен кәсіпорындар) форматында "Ақтау теңіз порты" АЭА базасында болады деп күтілуде.
 
Сондай-ақ, порт инфрақұрылымдарын дамыту шеңберінде 2025 жылға қарай Құрық портында "Саржа" көпфункционалды теңіз терминалын салу жоспарлануда. Жоба астық және әмбебап терминалдарды, жалпы жүк терминалдарын, сондай-ақ көлік-логистикалық орталықты салуды көздейді. Жоспарланған осы жұмыстарды жүзеге асыру - Қазақстан порттарының өткізу қабілетін тағы 9,4 млн тоннаға арттыруға мүмкіндік береді.
 
Маңғыстау облысының аумағында Арнайы экономикалық аймақ «Ақтау теңіз порты» арнайы экономикалық аймағын құру жөніндегі Қазақстан Республикасы Президентінің 2002 жылғы 26 сәуірдегі № 853 Жарлығына сәйкес 2003 жылғы 1 қаңтардан бастап 2028 жылғы 1 қаңтарға дейінгі қолданылу мерзімімен құрылды. Аумағы 2140 га құрайды және 9 жеке орналасқан субзонадан тұрады.

Бүгінгі таңда "Ақтау теңіз порты" АЭА аумағына салынған инвестициялардың жалпы көлемі 266,1 млрд. теңгені құрайды, оның ішінде шетелдік инвестициялар – 168,7 млрд.теңге.
406,7 млрд. теңгенің өнімі өндірілді, 1780-ден астам жұмыс орны құрылды, салық төлемдерінің сомасы - 54,2 млрд. теңгені құрады, 2,65 млрд. теңгеге өнім экспортталды.
1 теңге бюджеттік инвестицияларға 34,1 теңгеден жеке инвестициялар тартылды, 6,9 теңге салық аударымдары төленді.

АЭА-ның 49 қатысушысы тіркелді, оның ішінде 20 жоба іске асырылды, іске асыру сатысында - 29 жоба бар.

• 01.12.2022
• 293