Ақтөбе облысында медициналық-фармацевтикалық кластер құрылмақ

 Ақтөбе облысының әкімі Ералы Тоғжанов өңірге жұмыс сапарымен келген «СҚ-Фармация» ЖШС басқарма төрағасы Ерхат Есқалиев бастаған компания өкілдерімен кездесті.

         Кездесудің басты тақырыбы Ақтөбеде медициналық-фармацевтикалық кластер құру болды.

         Кластер қолданыстағы және жаңа дәрілік заттарды өндіретін, медициналық техниканы шығаратын инновациялық кәсіпорындарды, ғылыми-зерттеу институттарын, жоғары оқу орындарын, технопарктер мен басқа да ұйымдарды біріктіруге және құруға мүмкіндік береді. Олардың барлығы бір-бірімен байланысты болмақ, бұл жеке компаниялардың және жалпы кластердің бәсекелестік артықшылықтарын нығайтады. Жобаны іске асыруға әлемдегі жетекші медициналық жабдықтар мен дәрі-дәрмектер өндірушілер, медициналық компаниялар, орталықтар мен ғылыми институттарды тарту жоспарланып отыр.

         «Бүгінгі таңда инновациялық өнімдерді өндіруге, денсаулық сақтау саласын технологиялар трансферті, оны цифрландыру бағытында ілгерілетуге, сондай-ақ кластерлік бастаманы дамытуға ерекше мән берілуде. Өндірістік алаңдар мен жетекші медициналық жоғары оқу орындары Астана және Шымкент қалаларымен бірге Ақтөбе қаласында да бар. Бұл үш өңір – медициналық-фармацевтикалық кластер құруға ең қолайлысы және тартымдысы», — деді Ерхат Есқалиев.  Облыс әкімі бастамаға өңірлік деңгейде жан-жақты қолдау болатынын алға тартты.

         «Біз денсаулық сақтау саласына инвестициялар тартып, озық технологиялар мен инновацияларды енгізуге, жоғары технологиялық медициналық техника өндірісін Ақтөбеде шоғырландыруға, фармацевтикалық өндірісті дамытуға, дәрігерлердің біліктілігін арттыруға мүдделіміз. Біз осы бағыттар бойынша жұмысты қолдауға дайынбыз», - деп атап өтті Ералы Тоғжанов.

• 05.12.2022
• 231