Құрметті Думан Дүбекұлы! Қазақстан Республикасы Білім және ғылым министрлігі Сіздің сауалдарыңызға келесіні хабарлайды. 1. Қазақстан Республикасы «Білім туралы» Заңының 47 бабына сәйкес квота шегiнде педагогтік, медициналық және ветеринарлық мамандықтар бойынша оқуға түскен ауыл жастары қатарынан шыққан азаматтар жоғары оқу орнын бітіргеннен кейiн тиісінше мемлекеттік бiлiм беру ұйымдарында, мемлекеттік медицина ұйымдарында, ветеринария саласында қызметін жүзеге асыратын мемлекеттік органдар бөлімшелерінде не ауылдық жерде орналасқан мемлекеттік ветеринария ұйымдарында кемiнде үш жыл жұмысты өтеуге мiндеттi. Мемлекеттік білім беру тапсырысы негізінде басқа мамандықтар бойынша білім алған Қазақстан Республикасының азаматтары Қазақстан Республикасының Үкіметі айқындайтын тәртіппен кемінде үш жыл жұмыспен өтеуге міндетті. Мемлекеттік білім беру тапсырысы негізінде философия докторлары (РhD) бағдарламасы бойынша докторантураға оқуға түскен азаматтар оқуын бітіргеннен кейін жоғары оқу орындарында немесе ғылыми ұйымдарда кемінде үш жыл жұмысты өтеуге міндетті. 2. Студенттерге «Жұмыс істейтіндері туралы» анықтама жинату мақсатқа сай емес деп санаймыз. Себебі Білім және ғылым министрлігі жоғары білімді басқарудың біріңғай жүйесінде берілген ақпаратқа сәйкес жоғары оқу орындарын бітірушілердің жұмысқа орналасуының мониторингісін Зейнетақы төлеу мемлекеттік орталығының ақпараттық жүйесі арқылы жүргізеді. 3. Жұмысты өтеу жөніндегі міндетті орындамағаны үшін жас маман өзінің оқуына байланысты бюджет қаражаты есебінен шыққан шығыстарды өтеуге міндетті. 4. Қазақстан Республикасы «Халықты жұмыспен қамту туралы» Заңына сәйкес жергілікті Халықты жұмыспен қамту орталығы жұмыс іздеп жүрген адамдарға және жұмыссыздарға лайықты жұмыс таңдауда жәрдемдеседі, жұмысқа орналасу үшін жолдама береді. 5. Жоғары оқу орнын бітірушілерді жұмысқа орналастыру бойынша арнайы Қазақстан Республикасы Ұлттық экономика министрлігінің «Дипломмен ауылға» бағдарламасы іске асырылуда. Сонымен қатар Жас мамандарды бөлу және жұмысқа жіберу тәртібі реттеліп, жоғары оқу орындары мен жергілікті атқарушы органдардың (бұдан әрі – ЖАО) іс-қимыл жүргізу жүйесі анықталды. Анықтама: жоғары оқу орындары жыл сайын ЖАО-ға мемлекеттік тапсырыс бойынша оның ішінде «ауыл квотасы» бойынша оқуға түскен бітірушілерді жұмысқа орналастыру үшін өтінім жолдайды; ЖАО өтінімдерге сәйкес тоқсан сайын жоғары оқу орындарына кадрларға деген қажеттілік туралы ақпарат ұсынады; жоғары оқу орындары ЖАО ұсынған мәліметтерге сәйкес әлеуетті жұмыс берушілермен тікелей өзара іс-қимыл жүргізеді; жоғары оқу орындарында жас мамандарды жұмысқа дербес бөлу бойынша комиссиялар құрылады. 2016 жылғы бітіру қорытындысына сәйкес алғаш рет педагогикалық мамандықтар бойынша бакалавриатта мемлекеттік тапсырыс негізінде оқыған барлық бітірушілерді бөлу жүргізілді. Осы мақсатта 2015-2016 оқу жылының басында тиісті Жол картасы қабылданған болатын. Бітірушілерді жұмысқа орналастыруды Қазақстан Республикасын индустриалды-инновациялық дамытудың 2016-2019 жылдарға арналған мемлекеттік бағдарламасы (бұдан әрі – ИИДМБ) шеңберінде мақсатты даярлау есебінен қамтамасыз ету жоспарланып отыр.