Құрметті достар!

«Бәйтерек» ұлттық басқарушы холдингі - бұл Қазақстанның дамуының басты қаржы институты. Ол 2013 жылы ҚР Президентінің Жарлығымен құрылды және еліміздің Үкіметіне тікелей бағынады.

Холдинг даму институттары мен қаржы ұйымдарын тиімді басқару, Қазақстан экономикасының әртараптандырылуы, инновацияларды қолдау, экспортты дамыту, еңбек өнімділігін ұлғайту арқылы орнықты дамуына жәрдемдесу үшін құрылған.

Қазіргі уақытта «Бәйтерек» «Ұлт жоспары», «Нұрлы жер», «Нұрлы жол», Индустриалды-инновациялық дамудың мемлекеттік бағдарламасы, «Бизнестің жол картасы-2020» сияқты мемлекеттік және үкіметтік бағдарламаларды жүзеге асырумен айналысады.

Мен басқаратын Холдингтің құрамында 10 еншілес ұйым жұмыс істейді, олардың әрқайсысының еліміздің экономикасындағы өз рөлі бар.

Ірі кәсіпорындарды қолдай отырып, «Қазақстан Даму Банкі» АҚ, «KazakhExport» экспорттық сақтандыру компаниясы» АҚ, «Қазына Капитал Менеджмент» АҚ, «Қазақстанның жобалар дайындау қоры» ЖШС және «Қазақстан Инвестициялық Қоры» АҚ қарыздық және үлестік қаржыландыру, экспорттық операцияларды сақтандыру,  лизингтік қаржыландыру және жобаларды, оның ішінде мемлекеттік жеке меншік әріптестік механизмі бойынша ісе асырылатын жобаларды құрылымдау және сүйемелдеу бойынша консультациялық қолдау сияқты құралдарды ұсынады.

Шағын және орта бизнес үшін «Даму» кәсіпкерлікті дамыту қоры» АҚ кәсіпорындарға үш қолдау құралын ұсынады - сыйақы ставкасын субсидиялау, кредиттерге кепілдік беру және қаражатты екінші деңгейлі банктерде шартты орналастыру.

«Қазақстанның тұрғын үй құрылыс жинақ банкі» АҚ, «Қазақстан Ипотекалық Компаниясы» АҚ, «Тұрғын үй құрылысына кепілдік беру қоры» АҚ қаржыландыру, ипотекалық кредиттеу, субсидия және тұрғын үйді жалға беру арқылы тұрғын үй қолжетімділігін арттыруға  бағытталған.

Қазіргі уақытта «Бәйтерек» холдингі Мемлекет Басшысы Қасым-Жомарт Тоқаевтың тұрғын үй құрылысының бірыңғай операторын құру туралы тапсырмасын іске асыруда. Осыған байланысты холдингтің еншілес ұйымы – «Бәйтерек девелопмент» АҚ Қазақстандық ипотекалық компанияға қосылу жолымен таратылды. Ағымдағы жылдың соңына дейін оған тұрғын Тұрғын үй құрылысына кепілдік беру қорын қосу жоспарлануда. Бірыңғай оператор өз жұмысын 2021 жылдың 1 қаңтарынан бастайды. Ол үш ұйымның функцияларын орындай отырып, тек қана жеке құрылыс салушылармен және жергілікті атқарушы органдармен жұмыс істейтін болады.

Сонымен қатар, Қазақстан Даму Банкі және KazakhExport экспорттаушыларға қолдау көрсетеді, ал QazTech Ventures қорлардың қоры ретінде, венчурлық қаржыландыру, бизнес-инкубациялау және технологиялық консалтинг құралдары арқылы технологиялық кәсіпкерлікті дамытуға жәрдемдеседі.  

«Ашық диалог» платформасындағы менің блогым – «Бәйтерек» холдингінің ашық және айқын жұмыс істеуіне бейімділігі. Біз Қазақстанның әрбір азаматы холдингтің құзыретіне кіретін өз сұрақтарына жауап алғандығын қалаймыз. Мен сұрақтарға қол жетімді және қысқа мерзімде жауап беретін боламын!

Сіздерден сұрақтар мен сындарлы ұсыныстар күтемін!