Құрметті Қазақстандықтар РМҚК «Сарайшық» мемлекеттік тарихи-мәдени музей-қорығының «Ашық үкімет порталына» қош келдіңіздер! 

         Музей -  ғасырлар қойнауынан бізге жеткен жәдігерлер мен өткен тарихымызды еске түсіріп, ойлы көзбен өткеннен сабақ алып, алға жетелейтін рухани орын.

Елдігімізді кері қайырып, еңсемізді түзеген шақта Алтын Орда, Ноғай Ордасы, Қазақ хандығының астанасы болған Сарайшық қаласының бай тарихын насихаттау, ғылыми зерттеулерді ұйымдастыру және мемлекеттілігіміздің орталығы болған ортағасырлық дәстүрлі отырықшы мәдениетімізді таныстыру мақсатында – «Сарайшық» мемлекеттік тарихи-мәдени музей-қорығы қайта бой көтерді.

Музей-қорық жұмысының мәні мәдениет саласындағы қызметі, оның ішінде қазақ хындығының астанасы болған Сарайшық қаласының тарихын қалпына келтіру мақсатында ғылыми-зерттеулер жүргізу, мәдени-білім беру және танымдық-туризмді дамыту, тарихи-мәдени мұраны сақтау және қорын көбейту, осы арқылы Отанымыздың тарихын насихаттау арқылы ұлттық, патриоттық, отансүйгіштікті жүзеге асыру болып табылады.

Қазірде барша елдік мәселені білім мен ғылым тұрғысынан байыптау қа­жеттігі туып отыр. Сарайшық музей-қорығы да осы ұстанымды басшылыққа ала отырып, өз тарихына ынтызар қау­ымға  ортағасырлық Сарайшықта археологиялық қазба жұмыстарынан табылған жәдігерлерді қаз-қал­пында көрсетуді, қажетті жағдайда оларды қалпына келтіруді, экспонаттар­ды жинақтауды, түрлі экспеди­ция жасақтауды, алыс-жақын шет елдерде ғы­лыми-зерттеу жұмыстарын жүргізуді қолға алды.

          Мақсат осындай  кешенді жұмыстар арқылы елге де, шет елге де Қазақ елінің  бай тарихын таныту және өз жолы, бірнеше өркениетті бастан кешірген тарихы бар мемлекет екенін айқындау.

Осы бағытта музей қызметкерлері жоспарлы жұмыстарын жалғастыруда.

«Сарайшық» мемлекеттік тарихи-мәдени музей-қорығы жұмысы туралы қажетті ақпаратты алғыларыңыз келсе осы порталға сұрақтарыңызды қойып, өз пікірлеріңізді қалдыра аласыздар.

Сарайшық музей-қорығы «Ашық үкімет порталында» жиі бас қосайық қадірлі оқырмандар, іске сәт!