Құрамысов Д.Ж.

Сүйінбай атындағы Алматы облыстық филармониясының директоры

Құрамысов Данияр Жолдасханұлы 1970 жылы 14 қыркүйек күні Алматы облысы, Жамбыл ауданы, Қарақыстақ ауылында дүниеге келген. 1985 жылы 8 сыныпты бітіргеннен кейін Алматы қаласындағы П.Чайковский атындағы музыка училищесіне баян класына түсті. 1989 жылы осы оқу орнын аяқтап, Алматы мемлекеттік консерваториясына оқуға түсіп, аталмыш оқу орнын «Концерттік орындаушы, оқытушы, оркестр артисі» мамандығы бойынша аяқтады. 

Еңбек жолын 1994 жылы Жамбыл аудандық өнер мектебінде  бастады. 1997 жылы Алматы облыстық халық шығармашылығы орталығында қызмет атқарды. 2002 жылдан бері Сүйінбай атындағы филармонияда студия жетекшісі болып істеді. 2010 жылы осы мекеменің көркемдік жетекшісі, 2011 жылы Бас директордың орынбасары, 2017 жылдан директор қызметін атқарып жүр.

Сонымен қатар, Данияр Жолдасханұлы танымал дарынды композитор. Өнерсүйер қауым арасында 40-қа жуық әндердің авторы ретінде белгілі. Шығармашылығындағы айтулы жетістікерге тоқталып кететін болсақ, олар мынадай: Республикалық «Жас дарын» сыйлығының лауреаты (1996 жыл). «Жаңа ғасырға – жаңа ән» атты сазгерлердің  республикалық байқауының лауреаты.  «Елім менің» атты республикалық патриоттық әндер байқауының жүлдегері.

Ұлтымыздың өнерін, мәдениетін дамыту және насихаттау жолында сіңірген еңбегі үшін бірқатар марапаттарға ие болды. 2015 жылы Алматы облысының Құрмет грамотасымен, 2016 жылы «Қазақстан Республикасының Тәуелсіздігіне 25 жыл» мерекелік медалімен, 2017 жылы Қазақстан Республикасының Тұңғыш Президенті Н.Назарбаевтың Құрмет грамотасымен марапатталды.

2011 жылы ҚР Мәдениет қайраткері марапатына ие болды.