Құрметті оқырмандар! Мен сіздерді жеке блогта қарсы алуға қуаныштымын.

Бұл блогтың негізгі мақсаты - Батыс Қазақстан облыстық тарихи-өлкетану музейі және оның бөлімдерінің қызығушылық танытқан интернет желісіне әрбір келушіге сапалы, қызықты және пайдалы ақпарат беру болып табылады.

Музей - мәдени мекеме, ол өткен тарих пен қазіргі тарихты, материалдық және рухани байлықтарды жинақтап, сақтайтын, жиналған құжаттар мен жәдігерлерді зерделеп, зерттейтін, оны келешек ұрпаққа жеткізетін, тәлім-тәрбие беретін әлеуметтік орын. Музейдің ең басты міндеті - Ақ Жайық өлкесінің тарихымен, өркениетті мәдениетімен жастарды, жергілікті халықты, қала қонақтарын таныстыру.

Бүгінгі таңда облыс орталығы Орал қаласында, облыс аудандарында музейдің 18 бөлімі жұмыс істеп, халыққа қызмет көрсетуде. Олар: қаланың көне тарихынан мәлімет беретін Е.Пугачев музей-үйі, орыс әдебиетінің классигі А.С.Пушкин музей-үйі, Жәңгір хан атындағы тарихи-этнографиялық музейі, Табиғат және экология музейі, суретші Сәкен Ғұмаров музей-үйі, М.Маметованың мемориалдық музейі, "Рухани жаңғыру" музейі, Бөрлі өлкетану музейі, М.Шолоховтың мемориалдық музейі, Сырым ауданындағы Сырым Датұлы атындағы тарихи-өлкетану музейі, М.Мералиев атындағы Қаратөбе аудандық тарихи-өлкетану музейі, Жаңақала ауданындағы күйші Д.Нұрпейісова атындағы өнер музейі, Жаңақала аудандық тарихи-өлкетану музейі, Көктерек ауылдық тарихи-өлкетану музейі, Ақпәтер ауылдық тарихи-өлкетану музейі, Жәнібек аудандық тарихи-өлкетану музейі, Шыңғырлау аудандық тарихи-өлкетану музейі, В.И.Чапаев атындағы Ақжайық тарихи-өлкетану музейі.

 Егер Сіз көне дәуірлерден басталған бабалар тарихын баян етер маңызды дүниелер мен құнды деректерді өз көзіңізбен көріп, қолыңызбен ұстап, сол дәуірге саяхат жасап, ерекше әсер алып, қажетті мәліметтерді көңіліңізге тоқығыңыз келсе, музейге келіңіз.

ҰОС ардагерлері мен оларға теңестірілгендерге, мектеп жасына дейінгі, жетімдер және мүгедек балаларға ақысыз қызмет көрсетіледі.

Менің блогымда оқырмандар өз пікірлерін, ұсыныстарын қалдырып, бөлісе алады. Міндетті түрде сіздің барлық пікірлеріңізді оқып отыратын боламын.