Түркістан қаласында 110 кВ солтүстік қосалқы станциясы салынып жатыр

Түркістан қаласында 110 кВ солтүстік қосалқы станциясы салынып жатыр. Станция іске қосылғанда бірқатар бизнес нысандары, қаладағы екі мөлтек аудан, сонымен қоса, Сауран ауданының бірнеше елді мекен тұрғындары сапалы электр қуатымен қамтылмақ. Қуат көздерін арттыру, сапалы электрмен қамту өзекті мәселе болып тұр. Сондықтан бұл станцияның құрылысы уақтылы аяқталуы тиіс. Әлі де мұндай жобаларды көбейту жолын қарастырамыз. Өндірісті, кәсіпкерлікті дамытамыз десек қуат көздері мен инфрақұрылым сақадай-сай болуы тиіс.
Сауран ауданына жұмыс сапары барысында 200 адамды тұрақты жұмыспен қамтып отырған жиһаз цехының жұмысымен таныстым. Кәсіпорын жылына 2500 дана жиһаз шығарады. Кәсіпкер мемлекеттен жеңілдетілген несие алып, жұмыс күшін екі есе арттыруды көздеп отыр.
Сауран ауданында құрылыс жұмыстары қарқынды жүруде. Аудан орталығы Шорнақ елді мекенінен 38 га жер бөлініп, мемлекеттік органдардың 5 әкімшілік ғимараты бой көтерді. Сонымен қатар ауданда 3 жаңа мектептің құрылыс жүруде. Қосмезгіл елді мекеніндегі 300 орындық мектеп биыл пайдалануға берілмек. Мердігерлермен пікірлесіп, ұсыныстарын тыңдадым. Мәселе немесе кедергілер болса, дер кезінде шешуге атсалысамыз.
Бұдан бөлек, ауданда инфрақұрылымды жақсарту, абаттандыру, көгалдандыру, саябақтар мен спорт алаңшаларын салу бойынша жұмыстар жүргізілуде.

• 09.12.2022
• 246