Ордабасы тұрғындарымен кездестім

Аудан, қала тұрғындарымен биылғы кездесуім Ордабасы ауданында түйінделіп отыр. Ордабасылықтармен кездесіп, еркін пікір алмасып, сұрақтарына жауап бердім. Мегаполиске жақын орналасқан әрі транзиттік әлеуеті жоғары Ордабасы ауданының болашағы жарқын болады деп сенемін. Оған барлық алғышарттар бар. Әсіресе кәсіпкерлік пен индустриалды аймақтарды дамытуға мүмкіндігі мол. Ордабасы ауданының инфрақұрылымы жақсара түседі. «Ауыл – Ел бесігі» жобасы аясында 2022 жылы 18 елді мекенде 22 жоба іске асырылуда. Қызылжар, Көлтоған, Төреарық, Ықылас Темір және Дербес елді мекендерінде 5 фельдшерлік-акушерлік пунктің құрылысына республикалық бюджеттен қаржы қаралды Құрылысы 2023 жылы аяқталады. 14 елді мекендегі 47,2 шақырым болатын 20 көшеге қаржы қаралып, асфальт төсеу жұмыстары жүргізілуде. «Жайлы мектеп» жобасы шеңберінде жаңадан 5 мектептің құрылысы жоспарлануда.

Кездесуден кейін өңірдегі құқық қорғау органдары және департамент басшыларымен бірге бірыңғай қабылдау өткіздік. Әрбір шағым, өтініштер бойынша жауапты басшыларға тапсырма бердім.

Ордабасы ауданына жұмыс сапары барысында бірқатар кәсіпорындардың жұмысымен таныстым. Бүгінде Ордабасы ауданында «Стандарт Ресурсис» ЖШС-нің мұнай өңдеу зауыты жұмыс істеп тұр. Мұнда жоғары маркалы бензиннен бастап, бірнеше өнім шығарылады. 200-ге жуық адам жұмыспен қамтылған. Одан кейін «Бадам» индустриялды аймағында орналасқан полиэтилен бұйымдарын қайта өңдейтін және синтепон талшығын өндіретін «GREEN TECHNOLOGY INDUSTRIES» зауытында болдым. Зауыт өнімдері Ресей федерациясына экспортталуда.

Айта кетейін, ауданда 2022-2025 жылдарға арналған «Бірыңғай индустрияландыру картасы» аясында мыңнан астам жаңа жұмыс орнын құратын 6 жобаның биыл 3 жобасы іске қосылды.

Ауданда өндірісті дамытуға мүмкіндік мол. Индустриалды аймақ қолайлы аумақта орналасқан. Біз индустриалды аймақты одан әрі кеңейтіп, кәсіпорындар ашуға күш саламыз. Инфрақұрылым мәселесі толық шешіледі. Инвесторлар мен кәсіпкерлерге қолдау көрсетуге дайынбыз.

• 09.12.2022
• 294