Құрметті отандастар!

🇰🇿 Құрметті отандастар!

Баршаңызды еліміздегі ең ұлық мерекелердің бірі – Тәуелсіздік күнімен шын жүректен құттықтаймын!

Бұл күн мемлекеттігімізді айқындап, ұлт мерейін үстем ететін айрықша әрі мәртебелі мейрам. Ұлттық тарихы ықылым заманнан бастау алатын Қазақстан үшін Тәуелсіздіктен асқан қастерлі ұғым жоқ. Бабаларымыздан аманат болып қалған баға жетпес ең асыл қазынамызды сақтап, кейінгі ұрпаққа табыстау баршамызға ортақ парыз. Әлбетте, оның мызғымас кепілі – халқымыздың ауызбірлігі мен ынтымағында жатыр. 

30 жылдан артық уақытта жер көлемі жағынан әлемде 9-шы орынды алатын республика аумағында әуе, теңіз, темір жол және автокөлік қатынасы ретке келтіріліп, бұл ұлттық экономиканың күретамырына айналды. Мыңдаған тұрғын үй салынып, дамудың негізгі қозғаушы күшіне айналған өнеркәсіп орындары ашылды. 

Бүгінгі таңда алдымызға биік мақсат пен зор міндет қойылып отыр. Ол халықтың әл-ауқатын көтеріп, Қазақстанды бақуатты елдердің қатарына қосу. Көзделген жоспар мен жүктелген міндет тек ырысы мен ынтымағы, бірлігі мен тірлігі жарасқан қоғамда ғана сәтті жүзеге асатыны сөзсіз.

Қасиетті Отанымыз өркендеп, көк байрағымыз биіктен көрінсін!

• 16.12.2022
• 388