Сақтандыру төлемдеріне кепілдік беру қорының қызметі туралы

ҚР Қаржы нарығын реттеу және дамыту агенттігі «Қазақстан Республикасының кейбір нормативтік құқықтық актілеріне Сақтандыру төлемдеріне кепілдік беру қорының мәселелері бойынша өзгерістер мен толықтырулар енгізу туралы» Агенттік Басқармасының 2022 жылғы 23 қарашадағы №100 қаулысын қабылдады.

Қаулы ағымдағы жылғы 12 қыркүйекте қолданысқа енгізілген «Қазақстан Республикасының кейбір заңнамалық актілеріне сақтандыру нарығын және бағалы қағаздар нарығын реттеу мен дамыту, банк қызметі мәселелері бойынша өзгерістер мен толықтырулар енгізу туралы» ҚР Заңының нормаларын іске асыру мақсатында әзірленді және ҚР Ұлттық Банкі Басқармасының 4 қаулысына (24.09.2003ж. №345, 24.12.2012ж. №387, 26.07.2013ж. №184, 27.08.2018ж. №199) және ҚР Қаржы нарығын және қаржы ұйымдарын реттеу мен қадағалау агенттігінің 1 қаулысына (30.04.2010ж. №62) өзгерістер мен толықтырулар енгізуді көздейді.

Заң кепілдік берілетін сақтандыру сыныптарының тізбесін кеңейтеді. Енді Сақтандыру төлемдеріне кепілдік беру қорының (СТКҚ) кепілдігі Мемлекеттік білім беру жинақтау жүйесі шеңберінде сақтандырудың барлық міндетті сыныптарына, зейнетақы аннуитеттеріне және өмірді сақтандыруға қатысты қолданылатын болады.

Қаулы СТКҚ-ның сақтандырудың кепілдік берілетін жаңа сыныптары бойынша кепілдік төлемдерін жүзеге асыру рәсімдерін  жетілдіруді көздейді, сондай-ақ сақтандыру ұйымдары- қатысушылардың СТКҚ-ға жарналарының мөлшерлемелерін есептеу тәртібін айқындайды.

Қаулымен кастодианның СТКҚ резервінің қаражатын есепке алу және сақтауды жүзеге асыру бойынша талапты енгізу жөнінде заң нормалары іске асырылуда, кастодианның олардың нысаналы пайдаланылуын бақылау жөніндегі функциялары айқындалуда. Бұл СТКҚ резервтері  қаражатының сақталуын арттырады.

Бұдан басқа, Қаулымен СТКҚ-ның меншікті активтерін және СТКҚ резервтерінің қаражатын инвестициялау тәртібі, сондай-ақ СТКҚ-ның резерв қаражатын инвестициялаудан комиссиялық сыйақы ұстап қалу және сақтандыру ұйымдары-қатысушылардың СТКҚ-ға жиынтық жарналар төлеу тәртібін айқындайды.

Қаулыны қабылдау сақтандыру қызметтерін тұтынушылардың құқықтарының сенімді қорғалуын қамтамасыз ету үшін сақтандыру төлемдеріне кепілдік беру тетіктерін жетілдіруге мүмкіндік береді.

• 29.12.2022
• 175