Боран мен дауыл салдарын жою жұмыстары қатаң бақылауда

Түркістан облысында ауа-райының күрт өзгеріп, дауыл мен қатты қардың салдары  бірнеше аудандарда қолайсыздық тудырды. Соңғы бір тәулікте орын алған жағдай менің жіті бақылауымда.

Табиғаттың тосын мінез танытуынан қалыптасқан жағдайдың салдарын жою бойынша барлық жауапты құрылымдардың басшыларын жинап, жиналыс өткіздім. Жауапты мекеме басшыларына электр желілерін жөнге келтіру жұмыстарын күшейтуді тапсырдым. Тұрғындар жарықсыз отырмау керек. Жолдардың жабылуы кедергі болған ауылдарға қосымша техника жіберу қажет. Тиісті сала басшыларына қажет жағдайда қосымша адамдарды жұмылдырып, жұмысты жылдамдатуды тапсырдым. 

Елді мекендер ішінара жарықсыз қалған еді. Қазір жағдай тұрақталды. Бәйдібек пен Созақ аудандарындағы кей ауылдардың электр желілерін қалпына келтіру жұмыстары әлі де жалғасуда. Соңғы бір тәулікте қалыпқа келтіру жұмыстары күні-түні жүргізіліп жатыр. Оқиға орындарында жарық беруші компанияның бригадалары мен 50-ге жуық адам, 12 техника жұмылдырылған. 

Облыстық маңызы бар 8 жол әлі де жабық. Қарлы боран салдарынан республикалық маңызы бар «Қорғас-Алматы-Тараз-Шымкент-Ташкент» бағытындағы тас жол да жабылды. Облыс аумағында жолдарды тазалау үшін барлығы 100-ден астам адам мен 100-ден астам техника жұмылдырылған. Авариялық-құтқару жұмыстары тоқтаусыз жүргізіліп жатыр. Азаматтардың арыз-шағымдарын назарға алу үшін 109 бірыңғай байланыс орталығы жұмыс істеп тұр. Облыстық әкімдікке қарасты барлық құрылымдар күшейтілген жұмыс тәртібімен жұмыс істеді. 

• 09.01.2023
• 228