Оңтүстік аудандарда өндірісті дамытуға күш саламыз

Түркістан облысында өнеркәсіптің дамуына басымдық береміз. Жеке өндіріс және кәсіпорындардың артуына күш салып, индустриалды аймақтарды жаңа кезеңге шығаратын нақты жоспар қажет. 
Мақтаарал ауданына жұмыс сапары барысында өндіріс орындары мен құрылыс нысандарын араладым. Ақалтын елді мекенінде орналасқан ауданның индустриалды аймағының жұмысымен таныстым. Мұнда 5 кәсіпорын жұмыс істейді және жаңа күн электр станциясы іске қосылған. Бұл кәсіпорындарда 300-ге жуық адам тұрақты жұмыс істейді. Биыл осы индустриалды аймақта тағы асфальт-бетон зауыты және құс шаруашылығы фабрикасы іске қосылмақ. 
Облысымыздың басым бағыты – өндіріс және жұмыс орындарын ашу. Жаңа кәсіпорын ашамын, халықты жұмыспен қамтимын дейтін азаматтарға қолдау көрсетіледі. Аудан әкімдігі іскер, белсенді, нақты жобасы бар азаматтарға жағдай жасап, кәсібін ашуына көмектесуі тиіс. Мемлекет тарапынан берілетін жеңілдетілген несиелер мен субсидиялар лайықты адамдарға берілсе ғана өндіріс көлемі артады. Индустриалды аймақтың әлеуетін толық пайдалануды тапсырдым. Өзбекстанмен шекаралас жатқан Оңтүстік аудандардың дамуы, мұнда кәсіпорындардың ашылуы бақылауда болады. Бұл аймақтардың әлеуеті жоғары.
Іссапар барысында былтыр іске қосылып, 150 адамды жұмыспен қамтып отырған мақта өңдеу зауытында және 50-ге жуық адамды жұмыспен қамтып отырған май шығару зауытында болдым. Қазақстан мен Түркия елдері бірлесіп ашқан кәсіпорын жылына 2,9 мың тонна мақта майын, 14 мың тонна шрот өндіреді. Одан кейін «Атамекен» кедендік бекеті мен «Сырдария» бақылау-өткізу пунктінің жай-күйін, Нұрлыжол ауылында орналасқан 200 орынға арналған жаңа мектептің құрылысын бақыладым. Тапсырыс беруші мен мердігердің келісімшартта көрсетілген міндеттерін орындауы тұрақты қадағаланады.

• 16.01.2023
• 198