IX Азаматтық форум аясында ҮЕҰ өкілдерімен кездесуі

           "Қоғам және мемлекет: "Birgemiz" серіктестік пен дамудың 30 жылы" IX Азаматтық форумы аясында "Қазақстанның АӨК экспорттық саясатын жаңғырту" тақырыбында үкіметтік емес ұйым өкілдерімен онлайн-кездесу өткіздім. Іс-шараға Қазақстан азаматтық Альянсының президенті Бану Нұрғазиева, ҚР АШМ АӨК мемлекеттік инспекция комитетінің төрағасы Алмабек Марс және ҚР АШМ Ветеринариялық бақылау және қадағалау комитеті төрағасының міндетін атқарушы Гүлжан Нұртазина қатысты.

           Кездесу барысында қатысушылардан ауыл шаруашылығы өнімдерін экспорттау саласындағы жетістіктерді, түйіткілді мәселелерді және оларды шешудің тиімді жолдарын талқылауға шақырдым.

           Сондай-ақ, АӨК өнімдерін, оның ішінде қайта өңделген өнімдерді экспорттау саласындағы ағымдағы жағдайды атап өттім.

           2019 жылы АӨК өнімдерінің экспорты $3,3 млрд. АҚШ долларын құрап, бұл 2015 жылмен салыстырғанда 1,6 есеге артты. АӨК өңделген өнімінің экспорты бес жыл ішінде 1,2 есе – $1,1 млрд. АҚШ долларына дейін ұлғайды.

          Ағымдағы жылдың 9 айында Қазақстан шетелге ауыл шаруашылығы өнімін $2,1 млрд. АҚШ долларға, ал өңделген өнімді – $892 млн. АҚШ долларына дейін саудалады.

          "Жаңа өткізу нарықтарын ашу үшін импорттаушы елдердің фитосанитариялық және ветеринариялық талаптарынан өту, жеткізушілердің шетелдік тізімдеріндегі қазақстандық кәсіпорындардың тізбесін кеңейту бойынша жоспарлы жұмыс жүргізілуде. Бұл тізімдерге қазірдің өзінде 3182 қазақстандық кәсіпорын енгізілген. Шетелдік тізімдердегі кәсіпорындар санын көбейтуді ҚР ветеринарлық және фитосанитарлық қызметінің кепілдігі есебінен жоспарлап отырмыз.

          Сондай-ақ, ҚР АШМ тұрақты түрде экспортқа рұқсат беру құжаттарын ресімдеу мерзімдеріне, шет мемлекеттердің уәкілетті ұйымдары қоятын әкімшілік кедергілерге мониторинг және бақылау жүргізеді.

          Жиын барысында А.Марс және Г. Нұртазина мал шаруашылығы мен өсімдік шаруашылығы өнімдерінің экспорты туралы қосымша ақпарат берді.

         Кездесуге қатысушылар мүдделі министрлік өкілдеріне сұрақтарын қойып АӨК-дегі экспорттық саясатты жаңғырту тақырыбы бойынша пікір алмасып, ұсыныстарын ортаға салды. Онлайн кездесу соңында барлық ұсыныстар ҚР Ауыл шаруашылығы министрлігінің басшылығы мен қызметкерлерінің назарында болады.

• 26.11.2020
• 374