Азаматтарды тұрақты қабылдау туралы

Мемлекет басшысы Қасым-Жомарт Тоқаевтың Қазақстан халқына Жолдауында қойған «халық үніне құлақ асатын мемлекетті» қалыптастыру жөніндегі міндеттерді іске асыру мақсатында, сондай-ақ ҚР Қаржы нарығын реттеу және дамыту агенттігінің (бұдан әрі – Агенттік) қаржылық қызметтерді тұтынушылардың құқықтарын қорғау жөніндегі қызметі шеңберінде Агенттік басшылығы неғұрлым өзекті және маңызды мәселелерді шешу үшін жүйелі негізде азаматтарды қабылдайды.

19 қаңтарда өткен соңғы қабылдау барысында депозиттен жоғалған қаражатты қайтаруға, сақтандыру төлемін жүзеге асыруға және оның мөлшерін айқындауға, банк клиенттері арасындағы операциялар кезінде КЖ/ТҚҚ талаптарын сақтауға, кепілді кредиттік қарыздарды, оның ішінде кәсіпкерлік қарыздарды қайта қаржыландыруға, Ипотекалық қарыздарды қайта қаржыландыру бағдарламасына қатысуға, қарыздар бойынша бланкілік қалдықтарды есептен шығаруға,  сондай-ақ халықтың әлеуметтік осал топтарының өкілдері үшін қарыздарды қайта құрылымдауға қатысты мәселелер қаралды.

Бірде-бір өтініш назардан тыс қалмайтынын, азаматтар айтқан барлық мәселелер заңнама нормалары сақтала отырып орындалатынын атап өтемін.

2022 жылы Агенттікке азаматтардан 35,3 мыңға жуық өтініш келіп түсті, оның 65%-ы банк секторына тиесілі. Микроқаржылық қызметті жүзеге асыратын ұйымдар қызметінің мәселелері бойынша өтініштер 20%-ды құрайды, өзге ұйымдарға қаралған өтініштердің жалпы санының 15%-ы тиесілі.

Азаматтардың банктік қарыздары мен микрокредиттері бойынша мерзімі өткен берешекті реттеудің бірыңғай тәртібінің іске асырылуын мониторингтеу тұрақты түрде жүзеге асырылады. 2022 жылы банктерге қарыздарды қайта құрылымдау үшін 357,8 мың қарыз алушы жүгінді, оның ішінде 261,5 мың қарыз алушыға немесе жалпы санының 73,1%-на жасалған банктік қарыз шарттарының талаптарына өзгерістер мақұлданды. Микроқаржы ұйымдарына 239,1 мың қарыз алушы микрокредит бойынша берешекті қайта құрылымдау туралы өтінішпен жүгінді. Қаралғандардың ішінен 181,3 мың өтініш берушінің (өтініш бергендер санының 75,8%-ы) өтініші қанағаттандырылды.

Халықпен жедел өзара іс-қимыл жасау үшін Агенттікте call-орталық жұмыс істейді. 2021 жылы call-орталыққа 5,8 мыңнан астам азамат, 2022 жылы 13 мыңға жуық азамат қоңырау шалған.

Қаржылық қызметтерді тұтынушылардың құқықтарын қорғау Агенттіктің аса маңызды міндеттерінің бірі болып табылады, азаматтарды қабылдау жүйелі негізде жүргізілетін болады.

• 30.01.2023
• 218