Сақтандыру ұйымдарының тәуекелдерді бақылау жүйесіндегі өзгерістер туралы

2023 жылғы 23 қаңтарда Қазақстан Республикасы Қаржы нарығын реттеу және дамыту агенттігінің Басқармасы «Сақтандыру (қайта сақтандыру) ұйымдары, Қазақстан Республикасы бейрезидент-сақтандыру (қайта сақтандыру) ұйымдарының филиалдары үшін тәуекелдерді басқару және ішкі бақылау жүйесін қалыптастыру қағидаларын бекіту туралы» Қазақстан Республикасы Ұлттық Банкі Басқармасының 2018 жылғы 27 тамыздағы № 198 қаулысына өзгерістер енгізу туралы» қаулыны қабылдады.

Қаулыда сақтандыру (қайта сақтандыру) ұйымдары үшін тәуекелдерді бағалау және басқару құралдарын жетілдіру көзделген. Стресс-тестілеудің 5 сценарийін жаңарту және 4 жаңа сценарий әзірлеу көзделеді.

Атап айтқанда, валюталық, бағалық, пайыздық тәуекелдер бойынша стресс-тестілеу сценарийлері, сондай-ақ индекстеу мөлшерлемесінің өсуіне және сақтандыру (қайта сақтандыру) шарттарының бұзылуына байланысты аннуитет шарттары бойынша орын алмаған шығындар резервінің ұлғаю сценарийлері өзекті статистикалық көрсеткіштер ескеріле отырып пысықталды.

Бұдан басқа, сақтандыру ұйымдарының айырықша тәуекелдері бойынша қосымша сценарийлер: сақтандыру сыйлықақыларын жинауды тоқтата тұру, орын алмаған шығындар резервін ұлғайту, сақтандыру (қайта сақтандыру) шарттарын бұзу, қайта сақтандырушының төлемді уақтылы жүзеге асырмау сценарийлер және т.б. әзірленді.

Қаулы алғашқы ресми жарияланған күнінен кейін күнтізбелік он күн өткен соң күшіне енеді.

• 31.01.2023
• 173