Үш жыл ішінде Қазақстандағы қаржылық сауаттылық деңгейі 39%-дан 40,2%-ға дейін өсті

2020-2022 жылдар аралығындағы кезеңде Қазақстанда қаржылық сауаттылық деңгейінің өсуі байқалады: адамдар шоттарды төлеуге жауапты бола бастады, қаржылық жоспарлау мен бюджетті жүргізуде, ай сайынғы міндетті шығындарды төлегеннен кейін жинақтарды қалыптастыруда тәртіпті сақтайтын болды. Бұл жағдайды Қаржылық сауаттылықты арттырудың 2020-2024 жылдарға арналған тұжырымдамасын іске асыру шеңберінде Қаржы нарығын реттеу және дамыту агенттігі жүргізген әлеуметтанушылық зерттеудің нәтижелері дәлелдейді.

Агенттік қаржылық сауаттылық деңгейін 2020 жылдан бастап үш негізгі құрауыш бойынша өлшейді: «Меншікті қаржы қаражатын басқару», «Қаржылық қызметтерді пайдалану қабілеті», «Қаржы жүйесі туралы хабардар болу». 2022 жылы зерттеуге екі құрауыш  қосылды – қаржылық алаяқтық және мүгедектігі бар адамдардың қаржылық сауаттылығы.

Сауалнамаға қатысқан респонденттердің жалпы саны 2022 жылы еліміздің барлық өңірлерінен және республикалық маңызы бар үш қаладан 2 550 адамды құрады.

Тұтастай алғанда, сауалнама нәтижелері оң серпінді көрсетіп отыр. 2022 жылы Қаржылық сауаттылық индексі 40,2%-ды құрады – бұл өткен жылмен салыстырғанда 0,7%-ға артық (2021 ж. – INDEX = 39,52%; 2020 ж. – INDEX = 39,07%).

Ең жоғары көрсеткіш «Қаржы жүйесі туралы хабардар болу» құрауышы бойынша тіркелді – 41%, 2021 жылмен салыстырғанда өз деңгейін айтарлықтай арттырды (35,5%; ↑ 5,5%).

Екінші орында «Қаржылық қызметтерді пайдалану қабілеті» деген көрсеткіш, ол өз деңгейін 2022 жылы – 40,1%; 2021 жылы – 40,5% мөлшерінде сақтап қалды.

«Меншікті қаржы қаражатын басқару» құрауышы 39,6%-ды құрап, төмен көрсеткіш болды, бұл өткен жылмен салыстырғанда 3%-ға төмен (2021ж. – 42,57%).

Әлеуметтанушылық зерттеу нәтижелері бойынша Агенттік халықтың қаржылық сауаттылығын арттыру бойынша бірлескен жұмысты күшейту мақсатында мемлекеттік органдар, қаржы және қоғамдық ұйымдар үшін ұсынымдар әзірледі.

Зерттеу нәтижелері туралы толығырақ мына жерден оқи аласыз.

• 09.02.2023
• 209