Түркістан жұртшылығы түркиялық бауырлармен бірге!

Қ.А.Ясауи атындағы халықаралық қазақ-түрік университетіндегі түркиялық қызметкерлермен кездесіп, Түркиядағы жер сілкінісінен қаза тапқандарға құран бағыштадық. 

Түркия Республикасында болған аса ірі жер сілкінісі – бауырлас ел ретінде біздің де жанымызға қатты батты. Түркия – біз үшін қазақ халқына деген ерекше ықыласы мен көмегін аямаған, Қазақстан Тәуелсіздігін алғашқылардың бірі болып мойындаған ел ретінде ерекше ыстық. Бауырлас ел қиындыққа тап болған ауыр кезеңде де біз тұтастығымыз бен бірлігімізді көрсете отырып, қолдау білдіреміз. Мемлекет басшысының тапсырмасымен қазіргі таңда Түркияға көмек көрсетудің алғашқы легі іске асырылуда. Табиғи апаттың салдарынан қаза тапқан барлық азаматтардың жақындарына қайғырып, көңіл айтамын. Апат салдарын сезініп, аман қалған бауырларымыздың аман-есен жазылып, ел ортасына оралуын шын жүрекпен тілеймін. Шын жанашырлық пен бауырмалдық ел басына түскен ауыр кезеңдерде сын сағатына түсетіні белгілі. Түбі бір Түркі елдерінің рухани ұстыны саналатын Түркістан жұртшылығының атынан біз барлық сәтте Түркия Республикасының халқымен бірге екендігімізді жеткізгім келеді.

Түркістан өңірінің жұртшылығы да Түркиямен бірге. Қазірдің өзінде Түркістан облысынан 9 білікті дәрігер Түркияға баратын шұғыл көмек тобына енгізілді. Түркістан облыстық клиникалық аурухананың түркі тілін еркін меңгерген, білікті терапевт, ортопед, нейрохирург, ангиохирург, проктолог, хирург, невролог мамандары көмек көрсетуге дайын.

• 10.02.2023
• 240