Польшадан қаржы пирамидасының жетекшілерінің бірі экстрадицияланды

Польшаның Әділет министрлігі Қазақстан Бас прокуратурасының трансұлттық ұйымдасқан топ құрамында «QI Trade Kazakhstan» қаржы пирамидасын басқарғаны үшін іздеуде жүрген К.-ны экстрадициялау туралы өтінішін қанағаттандырды.

Ол 2018-2020 жылдар аралығында бөтеннің мүлкін жымқыру мақсатында қаржы пирамидасының жетекшілерінің бірі бола тұра, азаматтардың ақшалай салымдарын жалған жобаларға тарту арқылы қылмыстық схемасын ұйымдастырып, үлкен төлем жасау елесін қалыптастырған деген күдікке ілінген.

Ұйымдасқан топ мүшелерінің қылмыстық әрекеттерінің нәтижесінде зардап шеккен 1345 азаматқа 6,3 миллиард теңгеден астам шығын келтірілген.

Қылмыстарды жасағаннан кейін Қ., қылмыстық қудалау органдарынан қашып, халықаралық іздеуге жарияланған.

Бас прокуратура мен Ішкі істер министрлігінің қызметкерлері Сыртқы істер министрлігінің көмегімен күдікті К.-ны қылмыстық жауапкершілікке тарту үшін Қазақстанға экстрадициялады.

Қазіргі уақытта ол Астана қаласының тергеу изоляторына қамалды.

Жасаған қылмыстары үшін оған 5 жылдан 12 жылға дейін бас бостандығынан айыру жазасы қолданылуы мүмкін.  

Польша алғаш рет іздеуде жүрген адамды Қазақстанға экстрадициялады, бұл біздің елімізде жүргізіліп жатқан реформаларға, оның ішінде қылмыстық-құқықтық салаға деген сенімнің артқанын көрсететінін атап өткім келеді.

• 15.02.2023
• 241