Сарыағаш ауданында Түркістан облысындағы 1000-ыншы мектеп ел игілігіне пайдалануға берілді

Мемлекет басшысы балаларға жағдай жасауды ерекше тапсырды. Өнерлі, білімді, спортқа бейім балаларды жан-жақты дамыту керектігін айтты. Бұл тапсырманың біздің өңір үшін маңызы өте жоғары. Себебі еліміздегі сәбилердің бестен бірі Түркістан облысында дүниеге келеді. Облысымызда, қазіргі таңда 700 мыңнан астам бала бар. 2400-ге жуық білім беру ұйымы жұмыс істейді. 2023-2025 жылдары кезең-кезеңімен 96 мектептің құрылысын салу жоспарлануда.  Үш ауысымды мектептердің мәселесі ретімен шешіліп келеді. Өткен жылы 21 мектеп пайдалануға берілген болатын.

Президент тапсырмасы аясында білім саласында ауқымды жұмыстар атқарылуда. Соның нәтижесінде өңірдегі мектептер саны мыңға жетіп отыр. Балалар сапалы, алаңсыз білім алуына барлық мүмкіндіктен жасалуы керек.

Сарыағаштағы №78 жалпы орта мектебі толық заманауи технологиялармен жабдықталған. Білім ұясында оқу, медиа және спорт залдары, асхана, екі медициналық бөлме бар. Балалардың қауіпсіздігі үшін сыртқы және ішкі бақылау камералары орнатылған. 900 оқушының білім алуына барлық жағдай жасалған.

Мемлекет тарапынан жасалып жатқан бұл қолдаулар ұстаздарға шабыт береді және жас ұрпақтың сапалы білім алуына оң ықпал етеді деп санаймын. Мұндағы оқушылар ата-аналарының және ұстаздардың, елдің үмітін ақтайды деп сенемін.

• 17.02.2023
• 106