Жетісай тұрғындарын не алаңдатады?

Тұрғындармен кезекті кездесу Жетісай ауданында өтті. Кездесуде ауданда атқарылған жұмыстарға тоқталып, тұрғындардың көтерген өзекті мәселелеріне жауап бердім.

Аудан, қала әкімдеріне өңірді дамыту, халықтың әл-ауқатын көтеру бойынша нақты міндеттер жүктелген. Өңір дамытуға тұрғындар да белсене атсалысуы тиіс.

Әрине, бірінші кезекте ауданды дамыту тікелей әкімдердің іскерлігіне байланысты. Әрбір басшы облысқа, ауданға, ауылға бағытталған қаражаттын әр тиынын тиімді іске жұмсап, елге адал қызмет етуі тиіс. Мен аудан, қала әкімдерінен осыны талап етемін. Шынайы жанашырлықпен істелген жұмыстың ғана оң әсері болады. Бірақ халықтың көмегінсіз әкім бір өзі ештеңе істей алмайды. Әр тұрғын өз саласы бойынша ауылды дамытуға үлес қосулары тиіс. Әсіресе кәсіпкерлік саласында жобалар ұсыныңыздар, қолдауға дайынбыз. Қоғам дамуы үшін бәріміз өзгеруіміз керек. Жетісай шалғайда қараусыз қалып қойған аудан емес. Керісінше, даму үшін өте қолайлы аймақта орналасқан. Суармалы жері мол, кәсіпкерлікті дамытуға әлеуеті зор. Көрші елдің шекарасына жақын орналасқан. Бұл аймақ бойынша біздің жоспарларымыз бар. Шекара маңында өндірісті, сауданы дамытуға күш саламыз. Аймаққа теміржол тартылады. Жетісайды дамыту жұмысы жалғасады.

Кездесуден кейін тұрғындарды жеке мәселелері бойынша барлық сала басшыларының қатысуымен қабылдау өткіздік. Көтерілген мәселелер назарсыз қалмайды. Өткен жолғы тұрғындармен кездесуде көтерілген 10 мәселе шешімін тапты. Ералиев ауылдық округіндегі Мұратбаев елді мекенінің ауыз су жүйелері ағымдағы жөндеуден өтті. Сейфуллин елді мекенінде аяқжол салу мәселесі көтеріліп, 1,6 шақырым аяқжол салынды. Жылы су, Баққоныс, Байқоныс, Алтынкемер, Мақталы елді мекендерінде 32 көшеге орташа жөндеу жұмыстары жүргізілді. «Ауыл – Ел бесігі» бағдарламасы аясында Өркенді елді мекенінде футбол алаңының құрылысы басталды. Асықатадағы Әл-Фараби атындағы жалпы орта мектебіне қосымша оқу ғимараты, спорт залы және шеберханасының құрылысы қолға алынған.

Сонымен қатар ауданда «Жайлы мектеп» жобасы аясында 5 жаңа мектеп салынады.

• 17.02.2023
• 205