Мақтааралға теміржол тартылады

Мақтаарал жұртымен кездесіп, өзекті мәселелерді талқыладық. Ауданда өндіріс орындарын ашу жұмыстарын қолға аламыз. Мақтааралда жүгеріден көптеген өнім түрлерін шығаратын зауыт ашу үшін жұмыс жүруде. Жоба жүзеге асқанда жүздеген жаңа жұмыс орны ашылмақ.

Мақта мәселесі де шет қалмады. Егістікті әртараптандыру қажет. Былтыр біздің мақтаны көрші елдің біраз фабрикасы сатып алудан бас тартты. Сондықтан сапаны арттыруған жөн. Ол үшін өткен жылы Түркиядан жоғары сапалы шитті мақта тұқымын алып келу үшін келісімшарт жасалды. Мақтааралдың әлеуеті жоғары. Мұнда еңбекқор халық тұрады. Ел Президентінің тапсырмасымен «Дарбаза-Мақтаарал» теміржолының құрылысы жүреді. Саяси шешім қабылданып, экономикалық негіздемесі әзірленуде. Бұл бастама аймақтың дамуына тың серпін береді.

Көтерілген мәселелердің орындалу барысы менің жіті бақылауымда. Былтырғы кездесуден кейін де біраз мәселе өз шешімін тапты. Жамбыл елді мекенінің көшелеріне трансформаторлар орнатылып, электр желілері жүргізілді. Алаш елді мекенінде 300 орындық мектеп пайдалануға берілді. Жалын, Жайлыбаев елді мекендерінде жаңадан мәдениет үйлерін салуға қаржы қаралды. Мырзакент елді мекенінде спорт кешенінің құрылыс жұмыстары жүргізілмек.

Ел Президентінің ауылдарды дамыту тапсырмасы бойынша «Ауыл аманаты» бағдарламасы аясында шаруаларға несие беріледі. Мақтаарал ауданында бұл бағдарламаны пилоттық режимде бірнеше ауыл округтерінде іске асыру жоспарлануда. Ауданда «Жайлы мектеп» жобасы арқылы 5 жаңа мектеп салынады. Игілік ауылында бір ауысымды 50 адам қабылдайтын дәрігерлік амбулатория ашылады. Жұмыстарды осы жылы аяқтау жоспарлануда. Сондай-ақ Шаттық, Ақ алтын және Еңбекші елді мекендерінде медициналық пункттері салынады.

• 17.02.2023
• 181