Рейдерлікке қарсы іс-қимыл туралы

Құқық қорғау органдарының басшылығымен бірлесе, рейдерлікке қарсы іс-қимыл және кәсіпкерлік қызметке кедергі жасау мәселелері талқыланды.

Қылмыстық процесте бизнесті қорғау құқық қорғау және арнайы органдар жұмысының негізгі бағыттарының бірі болуға тиіс. Дәл осы салада кәсіпкерлер неғұрлым қатал қысымға тап болады.

2022 жылы рейдерлік фактілер туралы 19 қылмыстық іс тергелді (2021 ж. – 11). Тергеудің нәтижелері бойынша сотқа 2 іс жіберілді (4).

Елімізде осы санаттағы қылмыстарға қарсы іс-қимыл жөніндегі заңнаманы жетілдіру бойынша жоспарлы шаралар қабылдануда.

2011 жылы "Бизнесті және меншікті заңсыз басып алуға қарсы іс-қимыл мәселелері бойынша" Заңмен алғаш рет рейдерлік жасағаны үшін қылмыстық жауаптылық енгізілді.

Сондай-ақ Қылмыстық кодекстің 249-бабы осы қылмысты жасаудың жаңа тәсілдерімен толықтырылды, жауаптылық күшейтілді. Оның білікті құрамы ауыр қылмыстар санатына жатқызылған. Құқық қорғау, бақылау және өзге де органдардың ресурстары мен өкілеттіктерін пайдалана отырып не сот тәртібімен басып алу орын алған кезде рейдерліктің "сыртқы, күштік" деген жаңа құрамы енгізілді.

Кеңестің шешімімен қылмыстық қудалау органдарының басшыларына және облыстардың прокурорларына адал кәсіпкерлердің бұзылған құқықтарын қалпына келтіру бойынша шаралар қабылдай отырып рейдерлік фактілерді анықтау және жолын кесу жөніндегі жұмыстарды жандандыру ұсынылды.

Ведомствоаралық жедел кеңестің нәтижелері бойынша бірқатар ұсыныстар, оның ішінде заңнамалық сипаттағы ұсыныстар әзірленді.

• 21.02.2023
• 177