Түркістанда кезекті туристік маусым ашылды

Биыл Түркістан облысының құрылғанына 5 жыл толады. Осы қысқа ғана уақытта облыс пен Түркістан қаласының жаңа дәуірі басталды. Тарихи шаһарда жүздеген нысан бой көтеріп, адам танымастай өзгерді. Мемлекет басшысы Қасым-Жомарт Тоқаевтың Түркістанға тарихи және рухани елорда мәртебесін беруді тапсырмасы аясында жүйелі жұмыстар атқарылуда.

Өздеріңіз білетіндей, туризм – облыс экономикасының басым салаларының бірі. Облыс аумағында 1700-ден астам тарихи және мәдени ескерткіш  бар. Соның ішінде ЮНЕСКО-ның дүниежүзілік мәдени мұра нысандарының тізіміне енгізілген Қожа Ахмет Ясауи кесенесі орналасқан. Облыстың табиғаты да айрықша. Саяхат – адамды сергітетін сала. Сондықтан біз туризмнің салаларын жан-жақты дамытып қана қоймай, экологиялық сауаттылықты, саяхаттау мәдениетін де көтеруіміз керек. 

Түркістан облысында саяхатшыларды қызықтыратын орындар көп. Өңірде ЮНЕСКО-ның биосфералық нысандары тізіміне енгізілген «Қаратау» және «Ақсу-Жабағылы» табиғи қорықтары, «Сайрам-Өгем» ұлттық табиғи паркі, Қазығұрт тауы мен Машат шатқалы орналасқан. Сарыағаш ауданында минералды су көздерімен емдік-сауықтыру туризмі дамыған. Түркі жұртының назарындағы киелі Түркістан қаласына да келушілер саны жыл сайын артуда.

Отандастарымыз бен шетелдіктерді Түркістан өңіріне саяхаттауға шақырамыз! Сіздерді жаңа жылда жаңарған Түркістанда қарсы алуға әрқашан дайынбыз!

• 17.03.2023
• 207