Қазақстан СІМ-де британдық Форин-офис басшысымен жан-жақты серіктестікті нығайту талқыланды

Астана, 2023 жылғы 18 наурыз - Бүгін Ұлыбританияның Сыртқы істер, достастық және халықаралық даму министрі Джеймс Клеверлидің Қазақстанға алғашқы ресми сапары өтуде. Жұмыс бағдарламасы шеңберінде британ дипломатиясының басшысы Қазақстан Президенті Қасым-Жомарт Тоқаевтың, Премьер-Министр Әлихан Смайыловтың қабылдауларында болып, сондай-ақ Сыртқы істер министрінің орынбасары Роман Василенкомен екіжақты және көпжақты ынтымақтастықтың өзекті мәселелері бойынша «сағаттарды теңестіру» үшін келіссөздер жүргізді.

Сапардың негізгі аспектілерінің бірі Қазақстан мен Ұлыбритания арасындағы саяси, экономикалық және сауда-инвестициялық өзара іс-қимылды одан әрі нығайтуға бағытталған бірқатар екіжақты құжаттарға қол қою болып табылады. Атап айтқанда, Маңызды минералды шикізаттар саласындағы стратегиялық серіктестік туралы өзара түсіністік туралы меморандумға, Жасыл сутегі бойынша стратегиялық серіктестік туралы өзара түсіністік туралы меморандумға, сондай-ақ Дүниежүзілік банктің «Экономикалық даму үшін тиімді басқару» бағдарламасын бірлесіп іске асыру туралы өзара түсіністік туралы меморандумға қол қойылды.

Сонымен қатар, кездесулер барысында тараптар сауда, инвестициялар, орнықты даму, білім беру, мәдениет және басқа да салаларды ілгерілетуге жәрдемдесуге арналған стратегиялық әріптестік пен ынтымақтастық туралы жақын болашақта жаңа екіжақты келісімге қол қоюға дайын екендігін мәлімдеді.

ҚР СІМ-дегі кездесу барысында тараптар қазақстандық-британ өзара іс-қимылының барлық спектрі бойынша: экономикалық ынтымақтастық жағдайынан және өткен жылы 1,8 млрд АҚШ долларға жеткен тауар айналымын одан әрі ұлғайту перспективаларынан бастап, көміртекті бейтарап даму мәселелері бойынша білім беру және ноу-хау алмасу салаларындағы өзара тиімді іс-қимылды дамытуға дейін пікір алмасты.

Қазақстанда Құрама Корольдіктің жетекші жоғары оқу орындарының филиалдарын ашу және бірлескен білім беру және қос дипломды бағдарламаларды іске асыру мәселесіне ерекше назар аударылды. Қазіргі уақытта елімізде британдық Де Монфорт университетінің филиалы жұмыс істейді және Хериот-Уотт университетінің филиалын ашу жоспарлану үстінде.

Дж. Клеверли «Әділетті Қазақстан» құру аясындағы реформалар бағытына қолдау білдіріп, елімізге саяси және әлеуметтік-экономикалық даму жолында одан әрі табыстар тіледі.

Сапар аясында Ұлыбритания Патшайымы Елизавета II құрметіне елордалық сквердің ашылуы, «Астана» халықаралық қаржы орталығына бару және британдық университеттердің қазақстандық түлектерімен әңгімелесу өтті. Мәдени бағдарлама барысында британдық делегация Қазақстанның тарихымен, әдет-ғұрыптарымен және ұлттық тағамдарымен танысты.

Ынтымақтастықтың 30 жылдан астам уақыт бойы Ұлыбритания экономикамызға 16 млрд АҚШ долларынан астам инвестиция салып, Қазақстанның негізгі сауда-экономикалық әріптестерінің бірі болып табылады. Қазіргі уақытта қазақстандық нарықта британдық капиталдың қатысуымен 550-ге жуық компания, бірлескен кәсіпорын мен өкілдік ұсынылған.

• 19.03.2023
• 170