Қадірлі қауым! Құрметті Түркістан жұртшылығы!

Сіздерді Ұлыстың ұлы күні – Наурыз мерекесімен шын жүректен құттықтаймын!

Халқымыз үшін Наурыздың орны ерекше. Наурыз – жанға шуақ, жүрекке жылулық сыйлайтын мереке. Наурыз – жылдың басы ғана емес, жаңару мен жаңғырудың айқын белгісі.

Түркістан өңірінде көктем ерте келеді. Наурызды атап өту осы аймақтан бастау алады. Биыл Түркістан облысында Наурыз мерекесі ерекше аталып өтуде. Бүкіл аудан, қалада, ауылдарда елді тазалыққа, бірлікке, елдікке, берекеге бастайтын игі іс-шаралар он күн бойы жалғасты. Ұлттық болмысымыз бен мәдениетіміз, құндылықтарымыз, салт-дәстүрлеріміз дәріптелді.

Мемлекет басшысы Қасым-Жомарт Тоқаев облыс тұрғындарымен кездесуде Түркістанға тарихи және рухани елорда мәртебесін беру мәселесін көтерді. Жаңа мәртебе қаламыздың одан әрі дамуына жаңа серпін беретіні сөзсіз.

Биыл Түркістан облысының құрылғанына 5 жыл толады. Берекелі өңірдің бірлігі жарасқан, еңбекқор тұрғындары биылғы Наурыз мерекесін толайым табыстармен қарсы алып отыр. Түркістан қаласының жаңа дәуірі басталып, қысқа уақытта адам танымастай өзгерді. Мәдени, әлеуметтік, спорттық ғимараттар, зәулім үйлер салынды. Жаңа шағынаудан пайда болды. Бұл жетістіктің бәрінде халқымыздың қосқан үлесі мол. Еңбегімен дараланған азаматтар аймақты дамытуға тың серпін беріп жүр. Сондықтан сіздерге Ұлыстың ұлы күні қарсаңында шынайы алғысымды білдіремін. Түркістанымызды Түркі әлемінің орталығына айналдыру жұмыстары тоқтамайды.

Ардақты ағайын!

Ұлыстың ұлы күні барлық өкпе-реніштер ұмытылып, ізгілік пен бірлік салтанат құрады. Ел арық-атыздарды тазалап, ағаш отырғызады. Осы игі дәстүріміз Түркістан облысында жалғасын тауып келе жатқаны қуантады. Ұлттық құндылықтарымыз төрге шығып, еліміздің абыройы асқақтай берсін!

Баршаңызды Наурыз мерекесімен құттықтай отырып, отбасыларыңызға амандық тілеймін. Әр шаңыраққа шаттық ұялап, ұрпақ көбейсін!

Қазақстанымыз қуатты, мемлекетіміз тұрақты, Түркістанымыз абыройдың биігінде болсын!

• 27.03.2023
• 166