Түркістанда «KAZAGRO/KAZFOOD TURKISTAN 2023» I халықаралық сауда көрме-жәрмеңкесі өтті

Түркістан облысында ауыл шаруашылығын дамыту бағытында ірі жобаларды қолға алдық. Осы орайда бүгінгі ұйымдастырылып отырған «AgroForum Turkistan 2023» халықаралық форумынының маңыздылығы жоғары. Форум барысында ірі кәсіп иелерімен келіссөздер жүргізіліп, агросала табысын арттыру жолдарын талқыладық.

Түркістан облысы – ауыл шаруашылығын жүргізу үшін ең қолайлы өңірлердің бірі. Облыстың аграрлық секторында 74 мың агроқұрылым жұмыс істеп жатыр. Өңірдің 1 миллионға жуық ауыл тұрғынының экономикалық әлеуеті ауыл шаруашылығымен тікелей байланысты. Мемлекет басшысы Қасым-Жомарт Кемелұлы елімізде аграрлық саланың әлеуеті өте үлкен екендігін атап өткен болатын. Түркістан облысы құрылғалы бері ауыл шаруашылығының өсімі тұрақты даму үстінде. Соңғы 5 жылда жалпы өнім көлемі 2 есеге дейін ұлғайып, 1 трлн. теңгеден асты. Өнімділікті арттыруда жаңа технологиялар енгізіліп, ауыл шаруашылығы кешенінің тиімділігін арттыру жоспары жасалды. Суғармалы жерді тиімді игеру, ауыл шаруашылығын әртараптандыру, шикізат секторынан дайын өнім секторына өту, мақта кластерін дамыту бойынша нақты жоспарларымыз бар. Қайта өңдеу саласында 2023-2027 жылдар аралығында 110 инвестициялық жобаны іске асыру көзделуде. Нәтижесінде 5 мыңнан астам жаңа жұмыс орны құрылып, жыл сайын 230 млрд. теңгенің өнімі өндіріледі.

Форумда отандық және шетелдік инвесторлармен агроөнеркәсіптік кешен саласында жалпы құны 257 млрд. теңгені құрайтын 10 келісім меморандумын жасадық. Олардың ішінде, қызанақ өнімдерін өндіру және май комбинатын салу кластерін құру, Отырар және Шардара аудандарында жүгеріні терең өңдейтін крахмал-сірне зауытын салу, Арыс қаласында және Сайрам ауданында ет кластерін құру, Мақтаарал ауданында мақта-тоқыма кластерін құру бойынша компаниялармен меморандумдар жасалды.

«Түркістан» индустриалды аймағында шұлық және костюм шығару жобасы, Өзбекстанға ет экспорттау, Қырғызстанның Ош облысымен іскерлік және ынтымақтастық байланыстарды нығайту Жол картасы бойынша да меморандумдарға қол қойылды.

• 27.03.2023
• 225