Түркістан: «Аrtsport» бағдарламасының қаржысын тиімсіз жұмсаған 100-ге жуық кәсіпкерге шара көрілді

Түркістан облысында оқушыларды шығармашылық және спорт үйірмелермен қамту жұмысы қоғам  тарапынан оң бағаланып отыр. Өңірде әлеуметтік жағдайы төмен, көпбалалы отбасылардың балалары үйрімелермен қамтылып, шығармашылықтарын шыңдайды. Биыл Түркістан өңірінде бұл бағытқа 4,6 млрд. теңге қаралып, 30 мыңдай оқушыны өнер және спорт үйірмелерімен қамту көзделуде.

Облыста былтыр бағдарламаны жүзеге асыруда кемшілік пен алаяқтыққа жол берген 100-ге жуық кәсіпкерге шара көрілді. Өнер және спорт үйрімелері бойынша өз мақсатында жұмсалмаған 28 млн. теңге бюджетке қайтарылған.

Мониторинг және бақылау жұмыстарының күшейтілуі нәтижесінде 26 кәсіпкер өз жұмыстарын тоқтатқан. Атқарылған жұмыстар мен аппарат мәжілісінде баяндалды. Кемшіліктер де ашық айтылды.  Жауаптыларға мемлекеттің қаражатын балалар үшін тиімді жұмсауды тапсырды.

Аудан, қалалардағы ашылған үйірмелер өтетін ғимараттар заман талабына сай ретке келтірілуі тиіс.  Балалардың үйрімеге келгенін дәлелдейтін бейнебақылау, бәлкім бейнетіркеу жүйесін қолдану жолдары да қарастырылуы қажет. Кейбір аудандарда бұл бағытта жұмыс нашар. Облысымыздың барлық аймағында оқушыларға жағдай жасалуы тиіс. Екіншіден, спорттық үйрімелер өтетін залдарда толық жабдықталсын. Барлық ғимараттар санитарлық-гигиеналық талапқа сай болуы шарт. Балаларымыз таза әрі талапқа сай ғимараттарда жаттығуы қажет. Мәдениет пен спорт саласындағы өзекті мәселелер қадағалауда болады.

Жалпы, 2022 жылы спорт саласы бойынша 23 982 балаға арналған  982377,0 мың теңге игерілді. Облыста 2023 жылға мемлекеттік спорттық тапсырысты іске асыруға  2,4 млрд. теңге бөлу бастамасы қолдау тауып, қаржы көлемі артып отыр. Бұл 20 спорт түрі бойынша 14500 оқушыны қамтуға жетеді.

Мемлекеттік шығармашылық тапсырыс бойынша 2022 жылы 484,2 млн. теңге қаржы бөлініп, бірінші жартыжылдықта толық игерілген. Былтыр 34 кәсіпкердің ұйымдастыруымен 145 шығармашылық үйірме ашылып, 7487 бала 43 шығармашылық үйірме түрімен шұғылдануға мүмкіндік алды. Биыл 15270 бала шығармашылық үйірмеге қатысады деп жоспарланып отыр. Мемлекеттік шығармашылық тапсырысты жүзеге асыру мақсатында облыстық бюджеттен 2,2 млрд. теңге қаржы бөлінді.

• 17.04.2023
• 185