Өскелең ұрпақты шабыттандыратын мысалдар

Көрнекті мемлекет және қоғам қайраткері, ҰОС қатысушысы, 1-сыныпты мемлекеттік әділет кеңесшісі Өтеген Сейітовтің 100 жылдығын мерекелеу құрметіне елімізде ағымдағы жыл бойы мәдени-бұқаралық, спорттық және ғылыми іс-шаралар өткізілуде.

Ол өмірінің қырық жылын прокуратура органдарындағы қызметке арнады, оның он сегізін республиканың қадағалау органының бірінші басшысы ретінде өткізді.

Өтеген Сейітұлы құқықтық тәртіпті құрметтеуге, прокурорлық кәсіптің моральдық нормаларын мызғымас ұстануға басымдық берді.

Менің тапсырмам бойынша жыл басынан бері прокуратураның барлық ғимараттарында стендтер орнатылды, сондай-ақ Бас прокуратура мен Құқық қорғау органдары академиясының сайттарында Өтеген Сейітов туралы ақпараттар орналастырылды.

Еліміздің заң жоғары оқу орындарының студенттері арасында «Сейітов ізбасары» тақырыбында байқау ұйымдастырылды, онда олар белгілі прокурордың өмірбаяны мен кәсіби қызметін білуде бақ сынасты.

Жуырда Өтеген Сейітовті еске алуға арналған халықаралық ғылыми-тәжірибелік конференция өтті. Оған ТМД елдерінің ғалымдары мен практиктері, ғылыми және заң қоғамының өкілдері қатысты.

Жыл соңына дейін деректі фильм түсіру, Астанадағы көшеге Сейітовтің есімін беру, медаль шығару және оның ескерткішіне салтанатты түрде гүл шоқтарын қою рәсімі сияқты бірқатар маңызды іс-шаралар өткізу жоспарланып отыр.

Әділетті құқықтық мемлекет құруда біз осындай адамдардың тәжірибесіне сүйенуіміз керек.

• 28.04.2023
• 238