Жалпықалалық сенбілік өтті.

Жалпықалалық сенбілік өтті. Оған 62 мыңнан астам азамат қатысты. Олардың қатарында еңбек ұжымдары, басқарушы ұйымдар, бизнес өкілдері, мемлекеттік органдар, қоғам қайраткерлері, жастар, еріктілер және белсенді азаматтар бар.

Елордамыздың барлық ауданында ағаш отырғызу жұмысы жүргізілді. Бүгін 8 мыңға жуық жасыл желек (ағаштар, бұталар, көшеттер және т.б.) отырғызылды. «Жасыл Астана» эко-айлығы аясында мың тоннадан астам қоқыс жиналды. Қаланың 3,3 млн шаршы метрден астам жері тазартылды.

Елорданың желілік саябағында сенбілік пен ағаш отырғызу ісіне Мемлекет басшысы да атсалысты. Саябақта қаланы ары қарай көгалдандыру және абаттандыру жоспары таныстырылды. Биыл біз бір миллионнан астам жасыл желек (әртүрлі ағаштар мен бұталардың көшеттері) отырғызуды жоспарлап отырмыз. Сондай-ақ жоспар бойынша Есіл өзенінің бойындағы саябақтар мен демалыс аймақтары реконструкцияланып, аулалар мен қоғамдық кеңістіктер абаттандырылады.

Бүгінгі сенбілікке және ағаш отырғызуға қатысқан жандардың бәріне алғысымды білдіремін! Біз жұдырықтай жұмыла отырып, Астанамызды көгалдандыра түсеміз!

• 03.05.2023
• 195