ТЖ министрі су айдындарындағы қайғылы оқиғалардың негізгі себептері туралы айтты

Бүгін Үкімет отырысында Төтенше жағдайлар министрі Юрий Ильин еліміздегі су қоймаларындағы қауіпсіздік туралы сөз сөйледі.

Еліміздің су айдындарында адамдардың қаза болуының негізгі себептері жабдықталмаған орындарда шомылу, балаларды ересектердің қарауынсыз қалдыру, мас күйде және өз күштерін бағаламай шомылу болып қала береді.

Сонымен қатар, Юрий Ильин шомылуға арналған белгілі бір орындардың жеткіліксіз екенін, осыған байланысты жергілікті атқарушы органдар халыққа арналған жабдықталған жағажайларды ұйымдастыру жұмыстарын жалғастыру қажеттігі, бұл шомылу маусымының қауіпсіз өтуі үшін қажет екендігі туралы атап өтті. Шомылатын орындарды құру және жабдықтау - қауіпсіздіктің негізгі талаптарының бірі.

Бүгінгі таңда еліміз бойынша шомылуға рұқсат етілген 487 орын анықталғанын, оның ішінде 149 коммуналдық, 338 жеке жағажай екенін атап өтті. Азаматтардың қауіпсіздігін қамтамасыз ету үшін қажетті құтқару жабдықтарымен жабдықталған құтқару бекеттерімен қамтамасыз етілген 307 жағажай бар. Қалған 180 рұқсат етілген орын (коммуналдық және жеке) медициналық пункттермен және балаларға арналған шомылу учаскелерімен қамтамасыз етілмеген.

Жыл басынан бері еліміздің су айдындарында 69 адам құтқарылды, оның ішінде 15-і бала, шомылу маусымы басталғаннан бері - 11 адам, оның ішінде 2-еуі бала. Жүргізіліп жатқан профилактикалық жұмыстарға қарамастан 45 адам суда қаза болды, оның ішінде 14-і кәмелетке толмаған. Суға батқандардың ең көбі Ақтөбе, Абай, Қостанай облыстарында.

Адамдардың судағы қауіпсіздігін қамтамасыз ету мақсатында ТЖМ полиция департаменттерімен және әкімдіктермен бірлесіп ұйымдастырушылық және практикалық іс-шаралар кешенін өткізуде.

Мемлекеттік органдармен және әкімдіктермен бірлесіп 45 мыңнан астам рейдтік және үгіттеу жұмыстары жүргізілді, оған жүз мыңнан астам адам қатысты. Күнделікті рейдтік үгіттеу жұмыстары барысында 480 бұзушы әкімшілік жауапкершілікке тартылды.

Балалардың қауіпсіз жағажайларында, стационарлық жағажайларда  және модульді-қаңқалы бассейндерде (модульдік-қаңқалы бассейндерді сатып алу жүргізілуде) ТЖМ құтқарушылары әкімдіктермен бірлесіп балаларды жүзу дағдыларына үйретуде. Соңғы үш жылда жүз мыңнан астам кәмелетке толмағандар оқытылды. Ағымдағы жылдың басынан бері 19 мыңға жуық бала оқытылды.

Елдің кейбір аймақтарында инновациялық тәсілдер қолданылуда. Мысалы, Алматы қаласында су айдынын патрульдейтін және судағы қауіпсіздік ережелерін сақтау қажеттігін еске салатын дрон белсенді пайдаланылады. Ақтөбе облысында «FSM Expert» бағдарламалық қамтамасыз ету енгізілді, ол патрульдеу бағыттарын қалыптастырады және қадағалайды.

Қазіргі уақытта ТЖМ Экология және табиғи ресурстар министрлігімен бірлесіп, рұқсат етілген және шомылуға тыйым салынған орындарды карталарға енгізе отырып, интерактивті картаны өзектендіру мәселесі пысықталуда.

Бүгінде проблемалық мәселелердің бірі жүзу орындарының жанында олардың иелерінің жүзу құралдарын пайдалануы болып табылады. Мысалы, олардың көп бөлігі Алакөл көлінде байқалады. Осыған байланысты, көліктік бақылау инспекциясы осындай учаскелерді патрульдеу жиілігін арттыруды талап етеді.

Суға батқандардың көпшілігі өткен жылы мас күйінде болды, осыған байланысты өңірлерде бейнебақылау камералары арқылы мониторинг жүйесін енгізу қажет.

Каналдар және арықтардағы балалардың өлімі ерекше назар аударуды қажет етеді. Жыл басынан бері Түркістан, Атырау және Жамбыл облыстарында суару каналдарында («Арыс-Түркістан», «Алтынбеков», «Газалкент», «Ошақты» каналдары және «Тасарық», «Р11-С» арықтары) балалардың суда қаза болуы тіркелді. Қазіргі уақытта Түркістан облысында каналдарда баспалдақ көтергіштер мен кабельдер орнатылуда, бұл ұстап, жағаға шығуға мүмкіндік береді.

Министр бұл құрылғыларды орнатуды жеделдету керектігін, кең дренаждық және суару жүйелері бар қалған аймақтар үлгі алуы қажеттігін айтып өтті.

Шомылу маусымы мектеп демалысы кезінде болатынын ескере отырып, әсіресе су объектілерінің жанында орналасқан балалар лагерлерінде балалармен жұмысты ұйымдастыруға ерекше назар аудару қажет.

Елде 218 лагерь жұмыс істейді, оның 45-і су қоймаларының жанында орналасқан, 127 лагерьде бассейндер бар. ТЖМ құтқару бөлімшелері осындай балалар лагерлерінің су айдындарының 28 учаскесін зерттеді, қалған 17-сі бойынша жұмыс ағымдағы айда жоспарланған.

Судағы төтенше жағдайлардың санын азайту жөніндегі іс-шаралар кешенін жүргізу ел басшылығының, Үкіметтің, ТЖМ-нің және басқа да мүдделі мемлекеттік органдардың тұрақты бақылауында.

ТЖМ азаматтарға судағы қарапайым қауіпсіз жүріс-тұрыс қағидаларын сақтауға кеңес береді.

• 06.06.2023
• 178