Шәмшінің әндері шарықтады

Түркістан облысының құрылғанына 5 жыл толуына орай Елордамыз – Астана төрінде Шәмші Қалдаяқов атындағы облыстық филармонияның ұйымдастыруымен Қазақстанның Халық әртісі, ҚР Мемлекеттік Әнұранының авторы, қазақ вальсінің падишасы Шәмші Қалдаяқовтың әндерінен «Менің Қазақстаным!» атты ән кеші өтті.

Биыл Түркістан облысының құрылғанына 5 жыл толса, Шәмші Қалдаяқов атындағы Түркістан облыстық филармониясының ұжымына 60 жыл. Мәдение кеште ұлы композитордың халықтың жүрегінен мәңгілік орын алған әндері шырқалып, туындылардың шығу тарихы таныстырылды. Қазақ ұлттық аспаптар оркестрі өнер көрсетіп, көптің ықыласына бөленді. Ұлттық рухани мұрамыздың ажырамас бөлігіне айналған ұлы сазгердің есімі қазақ үшін қашан да құнды.

Сол күні Түркістан өңірінің тарихынан сыр шертетін көрме көпшілік назарына ұсынылды. Көрмеде ұлы тұлғалардың мұралары, түркі тілдес елдердің ұлттық киімдері, қылқалам шеберлерінің туындылары, оңтүстік өңірде түсірілген фильмдер, өлкенің бай мұрасы мен тарихы қамтылған.

Биыл Түркістан облысының 5 жылдығы аталып өтуде. Мемлекет басшысы Қасым-Жомарт Тоқаев Түркістанға ерекше мәртебе беру туралы бастамасы аясында ауқымды жобалар қолға алынып, жүзеге асты. Соңғы 5 жыл уақыт аралығында Түркістанға тартылған инвестиция көлемі ұлғайып, өнеркәсіп және ауыл шаруашылығы салаларының үлесі артқан. Қала жасыл желекке оранып, экологиялық ахуал жақсарған. Көпақабатты тұрғын үйлер пайдалануға беріліп, халықты сапалы ауыз су және табиғи газбен қамту жұмыстары қарқынды жүргізілді. Әлеуметтік-экономикалық маңызы бар нысандар бой көтеріп, жаңа жұмыс орындары ашылды. Туристер саны артты. Түркістанға берілген мәртебелі міндеттерді абыроймен атқарып, өңірді дамыту жолында жұмыстарды жалғастырамыз.

• 19.06.2023
• 212