МЕМЛЕКЕТ БАСШЫЛАРЫ ҚАЗАҚСТАН МЕН ГЕРМАНИЯ РЕКТОРЛАРЫНЫҢ ФОРУМЫНА ҚАТЫСТЫ

2023 жылғы 20 маусымда Астана қаласында Қазақстан Республикасының Президенті Қасым-Жомарт Тоқаев пен Германияның Федералды Президенті Франк-Вальтер Штайнмайер Қазақстан-Германия университеттерінің Форумына қатысты.

Форумға қатысушыларды құттықтай отырып, Қазақстан Республикасының Президенті Қасым-Жомарт Тоқаев Германия Президенті мен неміс университеттерінің өкілдеріне қатысқаны үшін алғысын білдіріп, бұл екі елдің ынтымақтастығын кеңейтуге мүмкіндік беретін еліміздің білім және ғылым саласындағы маңызды оқиға екенін атап өтті.

«Ғылым мен технологияны қоса алғанда, көптеген саладағы байланыстарымызды нығайтуға мол мүмкіндік бар. Қазақстанды Еуразиядағы зерттеу хабына айналдыру – арманым. Осы орайда менің арманымның жүзеге асуында неміс университеттері маңызды рөл атқарады. Ал мүмкіндіктер туралы айтатын болсақ, әрине, біз экономикалық серіктестігімізді нығайтуға баса назар аударамыз. Неміс инвесторларының экономикамыздың дамуына белсенді атсалысуын жоғары бағалаймын. Қазақстан Үкіметі бизнес-қоғамдастықтың еліміздегі ұзақ және қауіпсіз қызметі үшін қолдан келгеннің бәрін жасайды. Сіздердің бизнестегі, экономикадағы, сондай-ақ ғылыми саладағы кәсіптеріңіз табысты болуы үшін Қазақстан Үкіметі қабылдайтын барлық шараны талқыладық», – деп атап өтті Қасым-Жомарт Тоқаев.

Сондай-ақ, Мемлекет басшысы мұндай кездесулер тәжірибе алмасуға және өзара тиімді байланыс орнатуға мүмкіндік беретінін атап өтті. Ол қол жеткізілген уағдаластықтар мемлекеттеріміздің ғылыми әлеуетін арттыруға ықпал ететініне сенім білдірді.

Германия президенті Франк-Вальтер Штайнмайер сонымен қатар жоғары білім, ғылыми зерттеулер және студенттерді оқыту саласындағы ынтымақтастықтың маңыздылығына бас назар аударды. Ол сондай-ақ Германиядағы ДААД және Қазақстандағы «Болашақ» мемлекеттік бағдарламалары екі елдегі жоғары білім беруді интернационалдандырудың жақсы құралы болып табылатынын атап өтті.

«Біз Қазақстанмен кооперацияны жалғастырамыз және кеңейтеміз. Академиялық ынтымақтастық-біздің елдеріміздің тұрақты дамуының алғышарттарының бірі», - деді Франк-Вальтер Штайнмайер.

Германия президенті Қазақстанның білім мен ғылымында болып жатқан жаңғырту үдерістеріне де оң баға берді.

Іс-шара аясында Қазақстан мен Германияның жоғары оқу орындары арасында бірқатар келісімдерге қол қойылды. Жалпы ректорлар форумының жұмысына 11 неміс және 25 қазақстандық техникалық университеттердің өкілдері қатысты.

• 21.06.2023
• 178