ТЖ министрі Павлодар облысының тұрғындарымен кездесу өткізді

2023 жылғы 29 маусымда Қазақстан Республикасы Төтенше жағдайлар министрі Сырым Шәріпханов Павлодар облысының тұрғындарымен кездесті.

Өңір халқымен кездесу барысында министр ТЖ туындаған кезде халықты хабардар етуге, ТЖ алдын алу және қызметкерлерді әлеуметтік қамтамасыз ету бойынша жүргізіліп жатқан жұмыстарға қатысты өзекті сауалдарға жауап берді.

Сонымен қатар, ТЖМ басшысы өрт қауіпті және шомылу кезеңдерін қауіпсіз өтуіне ерекше назар аударды. Министр азаматтарға ТЖ кезінде жүріс-тұрыс ережелерін сақтауға, ата-аналарға балаларды қараусыз қалдырмауға және олардың қауіпсіздігі жөнінде шаралар қабылдауға кеңес берді.

Есеп беру кездесуі аясында министр бұқаралық ақпарат құралдарымен брифинг өткізді. Үкіметтік емес ұйымдардың өкілдерімен кездесіп, ведомствоның жұмысы, азаматтық қорғау жүйесін дамыту перспективалары, алда тұрған міндеттерді шешу туралы айтты.

Одан кейін министр ТЖ-ның алдын алу және олдарды жою саласына қатысты мәселелер бойынша жүгінген азаматтарды жеке қабылдады.

Халықпен кездесуден кейін министр Павлодар облысы ТЖ департаменті бөлімшелерінің жеке құрамымен кездесіп, төтенше жағдайлар органдары мен бөлімшелеріне жүктелген функцияларды нақты орындау қажеттігіне баса назар аударды, сондай-ақ құтқарушыларды қызықтырған сұрақтарға жауап берді.

Сонымен қатар, С.Шәріпханов соңғы жылдары құтқару бөлімшелерінің иелігіне түскен жаңа техника мен құтқару жабдықтарын қарап, құтқару бөлімшелерінің қызмет атқару шарттарымен танысты.

Кездесу аясында министрлік бөлімшелерінің қызметін өзара ынтымақтастық және жариялау, объективті және шынайы ақпарат беру, төтенше жағдайлар кезінде және техногендік сипаттағы азаматтардың мінез-құлық қағидаларын халыққа жеткізу мақсатында ТЖМ мен облыстық телеарналар арасында меморандумға қол қойылды.

Өз сөзінің соңында Сырым Шәріпханов жергілікті атқарушы органдар мен бизнес-қоғамдастық өкілдеріне, сондай-ақ еріктілер мен қарапайым азаматтарға азаматтық қорғау органдарына қолдау көрсеткені және құтқару операцияларына қатысқаны үшін алғысын білдірді.

• 29.06.2023
• 215