Қазақстан СІМ-де дипломатиялық корпус пен халықаралық ұйымдарға арналған ОАӨАҮО тақырыбы бойынша брифинг өтті

Астана, 2023 жылғы 3 шілде – Қазақстан Республикасы Сыртқы істер министрінің бірінші орынбасары Қайрат Омаров пен Есірткі құралдарының, психотроптық заттар мен олардың прекурсорларының заңсыз айналымына қарсы күрес жөніндегі Орталық Азия өңірлік ақпараттық үйлестіру орталығының (ОАӨАҮО) директоры Атагелді Язлыевтың төрағалығымен Қазақстан Республикасында аккредиттелген дипломатиялық корпус пен халықаралық ұйымдарға арналған ОАӨАҮО-ның қызметі туралы брифинг өтті.

Іс-шара аясында Қ. Омаров, А. Язлыев, БҰҰ-ның Есірткі және қылмыс жөніндегі басқармасының Орталық Азиядағы (БҰҰ ЕҚБ) Өңірлік өкілі Ашита Миттал, сондай-ақ ҚР Ішкі істер министрлігі мен Ұлттық қауіпсіздік комитеті өкілдері сөз сөйледі.

Сөз сөйлеу барысында Қ. Омаров бірде-бір ел есірткі мәселесін жалғыз шеше алмайтынын, сондықтан есірткі қаупімен күресу халықаралық қоғамдастық тарапынан бірыңғай және келісілген күш-жігерді талап ететінін атап өтті. Қазақстандық дипломат іс-шараға қатысушыларды ОАӨАҮО-мен оның жобалық қызметі және оған қаржылық қолдау көрсету бойынша ынтымақтастыққа шақырды.

Өз сөз сөйлеулерінде А. Язлыев ОАӨАҮО-ның есірткінің заңсыз айналымына қарсы күрестегі маңызды рөлін атап өтті, А. Миттал Орталыққа тұрақты қолдау көрсеткені үшін Қазақстан Республикасына алғысын білдірді, сондай-ақ донор елдерді ерікті жарналар бөлуге шақырды.

Сонымен қатар ОАӨАҮО өз жұмысының нәтижелерін өңірлік және жаһандық деңгейде, сондай-ақ оның халықаралық есірткі бизнесіне қарсы іс-қимыл мәселелеріндегі мүмкіндіктерімен таныстырды.

Анықтама: ОАӨАҮО 2009 жылы Алматыда БҰҰ Есірткі және қылмыс жөніндегі басқармасының (ЕҚБ) қолдауымен құрылды. Ұйым – Орталық Азиядағы есірткінің заңсыз айналымына қарсы іс-қимылға маманданған жалғыз ғана мемлекетаралық құрылым. ОАӨАҮО-ға қатысушы мемлекеттер: Қазақстан, Әзербайжан, Қырғызстан, Ресей, Тәжікстан, Түрікменстан және Өзбекстан, бақылаушылар: Аустрия, Ауғанстан, Беларусь, Ұлыбритания, Германия, Иран, Италия, Канада, Қытай, Пәкістан, Румыния, АҚШ, Түркия, Украина, Финляндия, Франция, Моңғолия, Швеция, Интерпол.

• 05.07.2023
• 207