Бейжіңде Қазақстан мен Қытайдың сауда-экономикалық ынтымақтастық жөніндегі кіші комитетінің 12-ші отырысы өтті

2023 жылғы 5 шілдеде Бейжіңде ҚР Сауда және интеграция Вице-министрі Қайрат Төребаевтың төрағалығымен және ҚР мүдделі мемлекеттік органдары мен ұйымдарының қатысуымен Қазақстан мен Қытайдың сауда-экономикалық ынтымақтастық жөніндегі кіші комитетінің кезекті 12-ші отырысы өтті.

Отырыс барысында тараптар екі ел басшыларының 2030 жылға қарай екіжақты тауар айналымын $40 млрд-қа дейін ұлғайту жөніндегі міндетіне қол жеткізу үшін бірлескен жұмысқа дайын екендіктерін бірауыздан білдіре отырып, сауданы дамытудың жай-күйі мен перспективаларын талқылады.

Қайрат Төребаев саудадағы шектеулерді жою және бизнес-қоғамдастыққа қолдау көрсету жолымен екіжақты сауда көлемін одан әрі ұлғайту және оның оң серпінін сақтау үшін бірлескен күш-жігердің қажеттігін атап өтті.

Сонымен қатар, тараптар көлік және транзит саласындағы ынтымақтастықты, өңіраралық ынтымақтастықты, сондай-ақ ЕАЭО, ШЫҰ және ДСҰ шеңберіндегі көпжақты форматтағы Қазақстан-Қытай өзара іс-қимылын дамыту мәселелерін талқылады.

Кіші комитеттің жұмысы аяқталғаннан кейін тараптар оның қорытындыларына қанағаттанушылықтарын білдіріп, Хаттамаға қол қойды.

Анықтама үшін: 2022 жылдың қорытындысы бойынша екіжақты сауда көлемі 2021 жылмен салыстырғанда 34,1%-ға ұлғайып, 24,1 млрд АҚШ долларын құрады. Атап айтқанда, экспорт 34,7%-ға өсіп, 13,2 млрд. АҚШ долларын құрап, импорт 33,5%-ға ұлғайып, 11,0 млрд АҚШ долларын құрады.

• 12.07.2023
• 162