Сырым Шәріпханов Алматының сейсмикалық қауіпсіздігі бойынша жұмысты күшейтуді тапсырды

Төтенше жағдайлар министрі Сырым Шәріпханов Алматы қаласына жұмыс сапары барысында Сейсмология институтына барды.

Сейсмология институтының директоры Дәулет Сәрсенбаев министрге жүргізіліп жатқан жұмыстар мен перспективалық жоспарлар туралы баяндады.

Сырым Шәріпханов баяндаманы тыңдап, жауапты бөлімшелерге Алматының сейсмикалық қауіпсіздігі бойынша жұмысты күшейту бойынша тапсырма берді.

Кеңеске Сейсмология институтының және «Сейсмикалық тәжірибе-әдістемелік экспедициясы» ЖШС басшылығы мен қызметкерлері қатысты.

Алматы қаласы 10 балдық сейсмикалық аймақта орналасқан. Жыл сайын қаладан 80 км радиуста 200-ге дейін әлсіз жер сілкінісі болады. Бұл ретте 2-ден 4 баллға дейінгі жер сілкінісі Алматы үшін фондық режим болып табылады. Қала аумағында 30-ға жуық тектоникалық ақаулар бар, олардың 60%-дан астамы қаланың таулы аймағында орналасқан.

Қазақстан Республикасы аумағының сейсмикалық қауіпсіздігі мақсатында бүгінгі күні 64 сейсмостанция жұмыс істейді.

Биыл Алматы қаласы әкімдігінің қолдауымен және институт есебінен ерте хабарлау жүйесінің тағы 37 станциясын орнату жұмыстары аяқталуда.

Өткен жылы бақылау желілерін дамыту үшін халықаралық жобалар аясында 16 жаңа станция орнатылды.

Институт 2021-2023 жылдарға арналған «Облыстар мен қалалар аумақтарының сейсмикалық қауіптілігін бағалау» бағдарламасына сәйкес Шығыс Қазақстан, Алматы және Жамбыл облыстарын егжей-тегжейлі сейсмикалық аудандастыру карталарын және Өскемен қаласының сейсмикалық микрозондтау карталарын әзірлеу бойынша жұмыстарды орындайды. Сонымен қатар, Сейсмология институты 2024-2026 жылдарға арналған 4 бағдарламаны әзірледі: «Қазақстанның сейсмикалығы және сейсмикалық қауіпсіздігі», «Жер сілкіністерінің мониторингі және болжамы», «Жер сілкіністерінен болатын залалдың болжамы», «Қазіргі ғылыми-әдістемелік негізде Қазақстан облыстары мен қалаларының аумақтарының сейсмикалық қауіптілігін бағалау».

Қазіргі уақытта Қытай Халық Республикасының Жер сілкінісі жөніндегі агенттікпен және геофизика институтымен бірлесіп Қытай тарапы есебінен 5 кешенді сейсмостанция орнату мәселесі пысықталуда. Бұл сейсмологиялық бақылау желілерін дамытуға мүмкіндік береді.

• 11.08.2023
• 224