Агенттікте ауыл шаруашылығы және экология салаларындағы бюрократиядан арылту мәселелері талқылады

Мемлекеттік қызмет істері агенттігінде Ауыл шаруашылығы, Экология және табиғи ресурстар министрлігі, Үкімет аппараты өкілдері, облыстар мен қалалар әкімдері орынбасарлары, азаматтық қоғам, Қоғамдық кеңес және бизнес өкілдерінің қатысуымен жұмыс кеңесі өтті.

Кездесу барысында МҚІА төрағасы Дархан Жазықбаев Агенттікпен Мемлекет басшысының мемлекеттік аппаратты бюрократиядан арылту жөніндегі Жарлығына сәйкес мемлекеттік органдардың бизнес-процестеріне талдау және мониторинг жүргізіліп жатқанын атап өтті. Өткен жылы Агенттік мемлекеттік органдардың әлеуметтік, қаржылық және сауда бағыттары бойынша қызмет процестеріне талдау жұмысын жүргізді. Нәтижесінде Агенттік 373 ұсыным әзірлеп, Президент әкімшілігіне жолдады. Жылдың екінші жартысында Агенттік Ауыл шаруашылығы және Экология және табиғи ресурстар министрлігі қызметіне талдау жүргізеді.

Дархан Жазықбаев жер қатынастары саласындағы мемлекеттік қызметтер көрсету мәселесі өте маңызды екенін атап өтті. Оның айтуынша, осы бағыттағы қызметтермен қанағаттанудың деңгейі 33,1% ғана құрайды. Агенттік төрағасы соңғы екі жылда мемлекеттік қызмет көрсету аясында азаматтардан жер қатынастары мәселелеріне байланысты 741 өтініш түскенін айтып, экология саласындағы процестерді оңтайландырудың өзектілігіне тоқталды.

Құрылымаралық өзара іс-қимылдың тиімділігін арттыру үшін орталық деңгейде 88 адамнан тұратын МҚІА, АШМ, Экология және табиғи ресурстар министрлігі қызметкерлерінен жұмыс тобы құрылды. Мұндай тәжірибе өңірлерде де қолданылатын болады.

Талдау жұмысы ауыл шаруашылығы саласындағы 800-ден астам функцияны және экология саласындағы 957 функцияны қамтиды. Іс-қимыл алгоритмі 3 кезеңнен тұрады.

Ауыл шаруашылығы вице-министрі Әбілқайыр Тамабек өз сөзінде жер қатынастары саласындағы, оның ішінде цифрландыру мәселелеріндегі соңғы өзгерістер туралы айтты. Ол АШМ бюрократиядан арылту аясында барлық процестерді цифрландыруға бағытталып отырғанын атап өтті.

Жиын соңында, Дархан Жазықбаев бюрократиядан арылту жобаларын тиімді іске асыру үшін қоғаммен сындарлы диалог жүргізудің маңыздылығын айтты. Ол мемлекеттік органдарды бюрократиялық процестерден мүмкіндігінше бас тартуға шақырып, Агенттік мемлекеттік органдарға осы бағытта барынша көмектеседі деп сөзін қорытындылады.

• 28.08.2023
• 189