ҚОЗЫБАЕВ УНИВЕРСИТЕТІНДЕ АРИЗОНА УНИВЕРСИТЕТІМЕН БІРЛЕСКЕН БІЛІМ БЕРУ БАҒДАРЛАМАЛАРЫ БОЙЫНША ОҚУ ЖЫЛЫНЫҢ САЛТАНАТТЫ АШЫЛУ РӘСІМІ ӨТТІ

Бүгін Манаш Қозыбаев атындағы Солтүстік Қазақстан университетінде Аризона университетімен (АҚШ) бірлескен білім беру бағдарламалары бойынша оқу жылының салтанатты ашылу рәсімі өтті. Іс-шараға ҚР Ғылым және жоғары білім министрі Саясат Нұрбек, мемлекеттік және жергілікті атқарушы органдар мен американдық Аризона университетінің өкілдері қатысты.

Бағдарламаның ауқымдылығын серіктестік бағдарлама бойынша оқуға түскен студенттер санынан байқауға болады. Егер 2022 жылы Қозыбаев университетіне Қазақстанның сегіз өңірінен балалар келсе, биыл – 18 облыс пен Республикалық маңызы бар қалалардан оқуға түсті.

«Мемлекет басшысы Қасым-Жомарт Тоқаев біздің алдымызға өңірлік университеттерде жетекші шетелдік жоғары оқу орындарының филиалдарын ашу міндетін қойды. Бұл елімізде академиялық және еңбек ұтқырлығын дамытуға ықпал етеді. Өкінішке орай, біздің талапкерлердің көпшілігі Алматы мен Астананың ірі университеттерінде оқуға тырысады. Бұндай жағдай осы қалалардың инфрақұрылымына ауыр жүктеме түсіреді. Сондықтан, осындай филиалдарды құру арқылы, біріншіден, біз жастарға сапалы халықаралық білімді тек үлкен қалаларда ғана алмауға болатынын көрсетеміз. Бұған дәлел – Қозыбаев университетінде ашылып жатқан бағдарлама. Биыл біз еліміздің 18 өңірінен келген балаларды қабылдадық. Осылайша, республикалық маңызы бар қалалардан жүктемені алып тастаймыз. Екіншіден, шетелдік университеттерді тарту есебінен өңірлерде білім беру сапасын арттырамыз. Сонымен қатар, біз өңірлік жоғары оқу орындарын күшейту мақсатын қойдық», - деп атап өтті министр Саясат Нұрбек.

Іс-шараға АҚШ делегациясы да қатысты. Оның құрамына қазақстандық студенттерге білім беретін ЖОО-ның басшы құрамының өкілдері мен оқытушылары кірді.

«Мен осы ынтымақтастықтың арқасында өмірлері өзгергелі тұрған жаңа студенттерімізді қарсы алғаныма қуаныштымын. Бүгін менімен бірге сіздер болашақта етене танысып, білісетін әріптестерім де келді. Біздің оқытушылар студенттер мен ата-аналарға оқуға қатысты кез келген сұрақтарға жауап беруге әзір», - деді Аризона университетінің көшбасшылық және әкімшілік жөніндегі арнайы кеңесшісі Джон Пауль Джонс.

Сондай-ақ, салтанатты шара аясында жоғары оқу орнының қонақтары Аризона университетінің бағдарламалары бойынша оқитын студенттермен кездесулер өткізді.

Айта кетейік, биыл 500-ден астам студент Аризона университетімен серіктестік бағдарламасы бойынша оқуға грант алды. Қос диплом бағдарламасы бойынша гранттық қаржыландыру 3 бағыт бойынша жүргізіледі (биология ғылымдары, ақпараттық технологиялар және инклюзивті білім беру). Оқыту ағылшын тілінде өтеді. Сәтті аяқтағаннан кейін білім алушылар екі диплом алады (қазақстандық және американдық).

Студенттерге Аризона университетінің цифрлық ресурстары, американдық оқытушылармен сабақтар, ай сайынғы стипендия, заманауи жабдықтары бар жаңа ғимарат, жатақханада тұру, студенттік жарқын өмір және тағы да басқалар қол жетімді. Бірақ болашақ студенттер үшін басты плюс – АҚШ-тағы университетте алты ай бойы білім алу мүмкіндігі.

Естеріңізге сала кетейік, халықаралық білім беру жобасы Аризона университетімен бірлесіп, М.Қозыбаев атындағы СҚУ базасында 2022 жылдың 6 қыркүйегінде басталды.

• 05.09.2023
• 180