МҚІА-да «Адал азамат» идеясын талқылау бойынша пікір алаңы өтті

Мемлекеттік қызмет істері агенттігінде «Адал азамат-мемлекеттік қызметшілдердің кәсіби-тұлғалық болмысы» тақырыбында пікір алаңы өтті. Шараның мақсаты – мемлекеттік қызметшілердің кәсіби-тұлғалық болмысын жетілдіруге бағытталған құндылықтар мен қағидаттар жайлы пікір алмасу.

Іс-шараға Президент Әкімшілігінің өкілдері, Сенат және Мәжіліс депутаттары, мемлекеттік қызмет ардагерлері мен қоғам қайраткерлері, мемлекеттік органдар мен ЖОО басшылығы,
ҚР Президенті жанындағы жастар саясаты кеңесі, талдау орталықтары, азаматтық қоғам, ғылым мен жастар ұйымдарының өкілдері және  тәуелсіз сарапшылар қатысты.

Агенттік төрағасы Дархан Жазықбаев Мемлекет басшысының  Түркістанда өткен ұлттық құрылтайдағы «Ең бастысы, біз мемлекеттік аппарат өкілдерінің сана-сезімін өзгертуге баса мән беруіміз қажет» деген сөзінің өзектілігіне тоқталып, мемлекеттік қызметшілер арасында «Адал азамат» құндылықтарын нығайтудың маңыздылығына тоқталды.  

«Мемлекеттік қызметті заман талабына сай түбегейлі жаңғырту тек құқықтық нормативтік құжаттарға өзгертулер енгізумен шектелмейді, мұндағы басты  міндеттердің бірі – мемлекеттік қызметшінің кәсіби-тұлғалық болмысын жетілдіру» - деді Агенттік төрағасы.

МҚІА басшысының айтуынша, бүгінде мемлекеттік қызметшілердің кәсіби-тұлғалық болмысына қойылатын талаптар әзірше тек Әдеп кодексімен ғана шектеліп отыр. Мұны жан-жақты, кешенді түрде жетілдіру үшін Агенттікпен «адамға бағдарланған» мемлекеттік қызметшілердің кәсіби және тұлғалық болмысы жайлы жаңа құжаттың жобасы әзірленген. Онда әрбір мемлекеттік қызметші ұстануы тиіс негізгі мақсатты дағдылар мен құндылықтарға кеңірек көңіл бөлініп, «Адал азаматқа» тән басты қасиеттерді топтастыру пысықталуда.

Кездесуге қатысушылар Мемлекет басшысының «Адал азамат» туралы  ой-пікірлерінің бүгінгі қоғам үшін аса маңыздылығы мен уақтылы қойылған мәселе екендігін атап өтті. Талқылау барысында мемлекеттік қызметшінің кәсіби-тұлғалық болмысын жетілдіру бойынша түрлі ұсыныстар беріліп, пікірлер айтылды.

Агенттік төрағасы пікір алаңына қатысушыларға алғысын білдіріп, мемлекеттік қызметшілер арасында «Адал азамат» идеалдарын ілгерілету бойынша жұмыстар жалғасын табатындығын, айтылған барлық ұсыныстар алдағы уақытта ескерілетінін айтты.

• 22.09.2023
• 209