Орталық Азиядағы сақтандыру XIV Халықаралық конференциясын өткізу туралы

Агенттік 2023 жылғы 20-21 қыркүйекте Орталық Азиядағы сақтандыру XIV Халықаралық конференциясы өткенін хабарлайды.

Конференция тәжірибе алмасу, ТМД елдерінің сақтандыру нарығының барлық қатысушылары үшін өзекті мәселелер мен міндеттерді талқылау, сондай-ақ сақтандыру секторын дамытудың перспективалары мен бағыттарын айқындау алаңы болып табылады.

Агенттік Төрағасының орынбасары Мария Хаджиева құттықтау сөз сөйлеп, Конференция сақтандыру нарығын реттеу мен қадағалауды жетілдіру, халықаралық стандарттарды енгізу, саланы цифрландыру мәселелері бойынша жинақталған тәжірибемен алмасуға мүмкіндік бергенін атап өтті.

Агенттік Төрағасының орынбасары Қазақстанның сақтандыру нарығының негізгі жетістіктерін және таяу болашақтағы дамудың басым бағыттарын белгіледі. Басты басымдықтардың қатарында саланы одан әрі цифрландыру, сақтандырудың міндетті түрлерін жүктелген түрлерге біртіндеп көшіру арқылы сақтандырудың жүктелген түрлерін дамыту, тәуекелге бағдарланған қадағалауды жетілдіру және іс-қимыл қадағалау моделін енгізу, елде апатты тәуекелдерден сақтандыру жүйесін құру атап өтілді.

Конференция барысында әр түрлі бағыттар бойынша панельдік сессиялар өткізілді: ТМД елдерінің нарықтарын сақтандырудың жай-күйі мен перспективалары, дамып келе жатқан актуарлық қауымдастықтардың қажеттіліктері мен ерекшеліктері, цифрлық технологиялар мен киберқауіпсіздік тәуекелдері, автосақтандыру, Solvency II-ге көшу бойынша тәсіл мен жоспарлар, 17 ҚЕХС енгізу шеңберіндегі актуарлық тәсілдер, апатты тәуекелдер.

• 27.09.2023
• 147