Бас прокуратурада жол қозғалысы қауіпсіздігі мәселелері Үйлестіру кеңесінің отырысында талқыланды

Жол қозғалысы қауіпсіздігін қамтамасыз ету және арттыру бойынша уәкілетті мемлекеттік органдар қабылдайтын шаралардың тиімділігі мәселесі бойынша Қазақстан Республикасының Заңдылықты, құқықтық тәртіпті және қылмысқа қарсы күресті қамтамасыз ету жөніндегі үйлестіру кеңесінің отырысы өтті.

Мемлекет басшысының тапсырмасы шеңберінде мүдделі органдарға жол қауіпсіздігін қамтамасыз ету жөнінде кешенді шаралар қабылдау, көлік жүргізу тәртібін бірлесіп арттыру, кез келген құқық бұзушылықтарға нөлдік төзімділік қағидатын сақтау ұсынылды.

Талқылау қорытындысы бойынша өңірлердің әкімдеріне бейінді министрліктермен бірлесіп қосымша жаяу жүргіншілер өткелдерін салу мәселелерін пысықтау, қажетті жол белгілерін орнатуды және жол құқық бұзушылықтарын тіркейтін автоматты камералар желісін кеңейтуді қамтамасыз ету ұсынылды. Оқушылар үшін қауіпсіз орта құруға ерекше назар аударылатын болады.

Ішкі істер министрлігіне жергілікті атқарушы органдармен бірлесіп жолдардың апаттық-қауіпті учаскелерінің тізілімін жасау, проблемалардың тізбесін айқындау және оларды дәйекті шешу ұсынылды.

Сондай-ақ ережелерді өрескел және бірнеше рет бұзғаны үшін жауапкершілікті қатаңдатуды көздейтін «Әкімшілік құқық бұзушылықтар туралы» Қазақстан Республикасының кодексіне түзетулерді пысықтау туралы мәселе көтерілді. 

Жалпы, жол апатын азайту үшін еліміздің жолдарындағы жағдайды түзетуге бағытталған бірқатар басқа ұйымдастырушылық және заңнамалық шаралар әзірленді.

• 29.09.2023
• 227