ҚР АШМ түркі инвестициялық қорының құрамында жұмыс тобын құруды ұсынды

16 наурызда түркі мемлекеттері ұйымына мүше елдердің (ТМҰ) қатысуымен құрылған Түркі инвестициялық қорының құрамында жұмыс тобын құруды ҚР Ауыл шаруашылығы министрлігі ұсынды. Бастаманы Бакудегі түркі мемлекеттері агробизнесінің II форумы алаңында вице-министр Әбілхайыр Тамабек жариялады.

Оның айтуынша, жұмыс тобы мемлекеттік органдарды, кәсіпкерлер мен инвесторларды ауыл шаруашылығы саласында біріктіре алады.

«Біз ұйымның әлеуетін пайдалануымыз керек. Бүгін Бакуде өткен кездесулерден кейін жаңа мемлекетаралық байланыстар орнатылып, жаңа жобалар іске асырылатын болады», - деп атап өтті Әбілхайыр Тамабек.

Сондай-ақ, вице-министр Қазақстанның агроөнеркәсіптік кешенінің көрсеткіштеріне жеке тоқталды. Әбілхайыр Тамабектің айтуынша, қазір елдің басымдықтарының бірі ауыл шаруашылығы шикізатын: ет пен сүтті, картопты, қант қызылшасын, майлы дақылдарды, жемістерді, көкөністерді, тері шикізатын өңдеуге шетелдік инвесторларды тарту болып табылады.

Айта кетейік, Түркі мемлекеттерінің Агробизнес форумы түркі мемлекеттері ұйымына мүше ауыл шаруашылығы министрлерінің II отырысы аясында өтуде. Іс-шара іскерлік және серіктестік байланыстарды орнатуға, сондай-ақ АӨК-де тәжірибе алмасуға ықпал етеді.

Іс-шараға Әзербайжанның ауыл шаруашылығы министрі Меджнун Мамедов, түркі мемлекеттері ұйымының Бас хатшысы, Елші Кубанычбек Өміралиев, Түркияның ауыл және орман шаруашылығы министрі Ибрагим Юмаклы, Өзбекстанның ауыл шаруашылығы министрі Азиз Войтов, СКТР ауыл шаруашылығы және табиғи ресурстар министрі Хусейн Чавуш, Қырғызстанның ауыл шаруашылығы министрінің бірінші орынбасары Мұрат Раматов, саладағы ведомстволардың өкілдері мен кәсіпкерлер қатысты.

• 01.10.2023
• 125