Сауда және интеграция министрі Маңғыстау облысының тұрғындарымен кездесті

Кездесуге өңірдің 200-ден астам кәсіпкерлері мен тұрғындары қатысты. Жұмыс сапары барысында Сауда және интеграция министрі Арман Шаққалиев бірқатар өндірістік нысандарды аралап, олардың жұмысымен танысып, кәсіпкерлердің шағын және орта бизнесті одан әрі дамыту жөніндегі ұсыныстарын тыңдады.

Министрдің сапары «Kaz Fruit Company» көкөніс қоймасына барудан басталды. Кәсіпорын 6 мың тоннаға жуық көкөністер мен жаңа піскен жемістерді өзінің заманауи қоймаларында сақтайды.

«Көкөніс қоймаларына жақсы желдету жүйесі, белгілі бір температура мен ылғалдылық қажет. Біз осы талаптардың барлығын ескердік. Автокөліктер бар, жүк көліктері келеді, біз бірден өлшейміз, мерзіміне сәйкес сақтаймыз. Әрі қарай сауда желілеріне, біздің өңірдің және екі облыстың – Орал және Атырау базарларына жібереміз».

Келесі нысан салынып жатқан «Ақтау» көтерме-тарату орталығы болды. Орталықтың жалпы ауданы 40 мың м2 құрайды. Сақтау қуаты 78 мың тонна, оның 20 мың тоннасы Климаттық қоймаға тиесілі. Кәсіпорын 200-ден астам жұмыс орнын құруды жоспарлап отыр.

Кәсіпорын директоры Бекзат Жеткізгеновтың айтуынша, КТО құрылысы жеке инвестордың қаражаты есебінен жүргізілуде. Нысан келесі жылы аяқталады деп жоспарлануда.

«Жеке көкөніс қоймаларын салу делдалдардың қызметінен толық немесе ішінара бас тартуға және қоймадан сапалы өнімді сату үшін жылдың кез келген уақытында қолайлы бағаны таңдауға мүмкіндік береді, - деп атап өтті кәсіпорын басшысы. - Біздің сақтау қуаттылығымызды ескере отырып, еліміздің ірі сауда желілерімен ынтымақтасқымыз келеді».

Маңғыстау облысы әкімдігінің мәліметінше, бұл мәселе пысықталуда. ҚР СИМ Сауда комитетімен бірлесіп ірі сауда желілерін тарту бойынша келіссөздер жүргізілуде, олардың басты талабы өңірде көтерме-тарату орталықтарының болуы болып табылады.

Қорытындылай келе, сауда министрі қазір ірі көтерме саудаға қайта бағдарлау бөлігінде ұлттық заңнамаға түзетулер енгізіліп жатқанын атап өтті.

«Өңірлерде осындай орталықтардың ашылуы сауда желілерінің өздеріне тікелей қызығушылық тудыры тиіс, өйткені олар үшін басты проблемалардың бірі сақтау қуатының жетіспеушілігі болып табылады. КТО құру сауданың өркениетті форматтарын дамытуға ықпал етеді», - деп түйіндеді Арман Шакқалиев.

• 02.10.2023
• 148